qalam se apne tasawwur ko qaid karne ka

qalam se apne tasavvur ko qaid karne kā

maiñ kaam kartā huuñ ġhazloñ meñ rang bharne kā

koī talāsh koī justujū to lāzim hai

yuuñ baiThe baiThe muqaddar nahīñ sañvarne kā

ye bachpane meñ diyā thā sabaq buzurgoñ ne

sivā ḳhudā ke kisī se nahīñ hai Darne kā

hamārī maut hī aa kar ise utāregī

ki jiite jī to nahīñ bojh ye utarne kā

qalīl vaqt masāfat tavīl hai yaaro

savāl hī nahīñ uThtā kahīñ Thaharne kā

hameñ to saath hī jiinā hai aur marnā bhī

yahī usuul hai duniyā meñ pyaar karne kā

ab is ko she'r meñ tabdīl yaar kaise kareñ

hamāre sāmne ik qāfiya hai jharne kā

kisī kī yaad ne pahre biThā diye haiñ 'samar'

ab is taraf se koī ġham nahīñ guzarne kā

qalam se apne tasawwur ko qaid karne ka

main kaam karta hun ghazlon mein rang bharne ka

koi talash koi justuju to lazim hai

yun baiThe baiThe muqaddar nahin sanwarne ka

ye bachpane mein diya tha sabaq buzurgon ne

siwa KHuda ke kisi se nahin hai Darne ka

hamari maut hi aa kar ise utaregi

ki jite ji to nahin bojh ye utarne ka

qalil waqt masafat tawil hai yaro

sawal hi nahin uThta kahin Thaharne ka

hamein to sath hi jina hai aur marna bhi

yahi usul hai duniya mein pyar karne ka

ab is ko she'r mein tabdil yar kaise karen

hamare samne ek qafiya hai jharne ka

kisi ki yaad ne pahre biTha diye hain 'samar'

ab is taraf se koi gham nahin guzarne ka