ranai-e-hayat hui kam hai in dinon

ra.anā.ī-e-hayāt huī kam hai in dinoñ

yādash-ba-ḳhair ziist ko ik ġham hai in dinoñ

vo din ga.e ki qatra-e-shabnam thī kā.enāt

dil apnā ab to qatra-e-shabnam hai in dinoñ

fikr-e-bahār hai na to gulshan kī yaad hai

le de ke ek terā hī bas ġham hai in dinoñ

rāh-e-vafā meñ Thokareñ khātā jabhī to huuñ

qismat meñ apnī laġhzish-e-paiham hai in dinoñ

āñkheñ churātā phirtā huuñ har jalva-gāh se

Dartā huuñ raushnī se ye 'ālam hai in dinoñ

ai vā.iz-e-harīs mubārak tujhe vo ḳhuld

merī nazar meñ ḳhuld-e-do-ālam hai in dinoñ

farmā.ish-e-ḳhumār pe kaise kahūñ ġhazal

mashq-e-suḳhan bhī dekhiye ab kam hai in dinoñ

'dīvān' kis ḳhushī meñ chale jhūmte hue

kyā phir kisī se rishta-e-mohkam hai in dinoñ

ranai-e-hayat hui kam hai in dinon

yaadash-ba-KHair zist ko ek gham hai in dinon

wo din gae ki qatra-e-shabnam thi kaenat

dil apna ab to qatra-e-shabnam hai in dinon

fikr-e-bahaar hai na to gulshan ki yaad hai

le de ke ek tera hi bas gham hai in dinon

rah-e-wafa mein Thokaren khata jabhi to hun

qismat mein apni laghzish-e-paiham hai in dinon

aankhen churaata phirta hun har jalwa-gah se

Darta hun raushni se ye 'alam hai in dinon

ai waiz-e-haris mubarak tujhe wo KHuld

meri nazar mein KHuld-e-do-alam hai in dinon

farmaish-e-KHumar pe kaise kahun ghazal

mashq-e-suKHan bhi dekhiye ab kam hai in dinon

'diwan' kis KHushi mein chale jhumte hue

kya phir kisi se rishta-e-mohkam hai in dinon