rahen KHilaf mere zahr bhi ugalne lagen

raheñ ḳhilāf mire zahr bhī ugalne lageñ

magar na itnā ki milne pe haath malne lageñ

to kyā badal luuñ maiñ apnā mizāj un kī tarah

jo ban ke saañp mirī āstīñ meñ palne lageñ

samajhnā ishq kī me.arāj mil ga.ī hai mujhe

mire mazār pe jab bhī charāġh jalne lageñ

bahut sañbhāl ke rakhtā huuñ khoTe sikke maiñ

ajab nahīñ ki kisī roz ye bhī chalne lageñ

hai aarzū ki vo Dāleñ nigāh-e-shoḳh idhar

jabīn-e-shauq meñ sajde ka.ī machalne lageñ

tumhārī yādoñ kī ḳhushbū fazāoñ meñ bikhre

havā.eñ mere irādoñ kī samt chalne lageñ

junūn-e-ishq hameñ hosh itnā rahne de

ki laḌkhaḌā.eñ agar ham to ḳhud sañbhalne lageñ

charāġh is liye shab ko nahīñ jalātā maiñ

kahīñ na saa.e mire hī mujhe nigalne lageñ

ab aise mom badan bhī nahīñ 'fahīm' ki ham

zarā sī garmī-e-ālām se pighalne lageñ

rahen KHilaf mere zahr bhi ugalne lagen

magar na itna ki milne pe hath malne lagen

to kya badal lun main apna mizaj un ki tarah

jo ban ke sanp meri aastin mein palne lagen

samajhna ishq ki mearaj mil gai hai mujhe

mere mazar pe jab bhi charagh jalne lagen

bahut sanbhaal ke rakhta hun khoTe sikke main

ajab nahin ki kisi roz ye bhi chalne lagen

hai aarzu ki wo Dalen nigah-e-shoKH idhar

jabin-e-shauq mein sajde kai machalne lagen

tumhaari yaadon ki KHushbu fazaon mein bikhre

hawaen mere iradon ki samt chalne lagen

junun-e-ishq hamein hosh itna rahne de

ki laDkhaDaen agar hum to KHud sanbhalne lagen

charagh is liye shab ko nahin jalata main

kahin na sae mere hi mujhe nigalne lagen

ab aise mom badan bhi nahin 'fahim' ki hum

zara si garmi-e-alam se pighalne lagen