raunaq-e-dil the jo aankhon mein samae hue log

raunaq-e-dil the jo āñkhoñ meñ samā.e hue log

ho ga.e ḳhvāb sabhī ḳhvāb dikhā.e hue log

dil kī daulat ko zamāne pe luTā.e hue log

der se pahuñche haiñ ham duur se aa.e hue log

jaise yak-laḳht kisī haath se motī chhūTe

is tarah ḳharch hue saare kamā.e hue log

tū ne jis ko bhī chhuā pāra-sifat kar Daalā

haath aa.e na tire haath lagā.e hue log

chāñd se chamke hue mahke hue phūloñ se

kaise hoñge vo tire qurb ko paa.e hue log

mujh ko samjhāte haiñ ādāb-e-nashist-o-barḳhāst

mere samjhā.e hue mere sikhā.e hue log

kisī mazlūm kī taklīf bhalā kyā jāneñ

chaltī phirtī huī lāshoñ meñ samā.e hue log

yak-ba-yak phail ga.ī 'nūr' fazā meñ vahshat

chalte chalte mire atrāf se saa.e hue log

raunaq-e-dil the jo aankhon mein samae hue log

ho gae KHwab sabhi KHwab dikhae hue log

dil ki daulat ko zamane pe luTae hue log

der se pahunche hain hum dur se aae hue log

jaise yak-laKHt kisi hath se moti chhuTe

is tarah KHarch hue sare kamae hue log

tu ne jis ko bhi chhua para-sifat kar Dala

hath aae na tere hath lagae hue log

chand se chamke hue mahke hue phulon se

kaise honge wo tere qurb ko pae hue log

mujh ko samjhate hain aadab-e-nashist-o-barKHast

mere samjhae hue mere sikhae hue log

kisi mazlum ki taklif bhala kya jaanen

chalti phirti hui lashon mein samae hue log

yak-ba-yak phail gai 'nur' faza mein wahshat

chalte chalte mere atraf se sae hue log