ret mein kitni hi sipiyan dafn hain jin ke sinon se gauhar nikalte rahe

ret meñ kitnī hī sīpiyāñ dafn haiñ jin ke sīnoñ se gauhar nikalte rahe

aur samundar meñ aise sadaf bhī haiñ jo motiyoñ ke liye haath malte rahe

rāh-e-ġham kī masāfat bhī kyā ḳhuub thī ḳhud hī girte rahe ḳhud sañbhalte rahe

rāsta bhī nayā thā safar bhī nayā jis taraf uTh ga.e paañv chalte rahe

aa.e auroñ ke dāman meñ to phuul bhī apne dāman meñ aañsū hī palte rahe

ham to majbūr ke taaq ke diip haiñ ḳhud hī bujhte rahe ḳhud hī jalte rahe

raaz kaisā bhī ho raaz phir raaz hai rāz-dāñ maiñ ne apnā banāyā nahīñ

maslak-e-ishq meñ ye baḌā jurm thā dil ke armān dil meñ machalte rahe

os se pyaas kis tarah bujhtī mirī jhulse jīvan ko ḳhvāhish thī barsāt kī

khetiyāñ vo jo pahle se shādāb thiiñ un pe din-rāt bādal machalte rahe

rahbaroñ kī siyāsat na kuchh pūchhiye rahzanoñ kī hifāzat na kuchh dekhiye

ḳhvāb tiryāk ke bhī sañvarte rahe saañp bhī āstīnoñ meñ palte rahe

laakh tūfān aa.e chalīñ āñdhiyāñ pattharoñ kī bhī barsāt hotī rahī

aise ashjār bhī is chaman meñ mile zulm sahte rahe aur phisalte rahe

aag firqa-parastī kī aisī lagī jo na ab tak kisī ke bujhā.e bujhī

rahnumā amn kā svāñg rachte rahe aur gharoñ se janāze nikalte rahe

kis qadar ban ga.e aaj vo sang-dil jin ke hāthoñ meñ patthar kabhī mom thā

ye na un kī samajh meñ 'zuhūr' aa sakā kitne sūraj andhere nigalte rahe

ret mein kitni hi sipiyan dafn hain jin ke sinon se gauhar nikalte rahe

aur samundar mein aise sadaf bhi hain jo motiyon ke liye hath malte rahe

rah-e-gham ki masafat bhi kya KHub thi KHud hi girte rahe KHud sanbhalte rahe

rasta bhi naya tha safar bhi naya jis taraf uTh gae panw chalte rahe

aae auron ke daman mein to phul bhi apne daman mein aansu hi palte rahe

hum to majbur ke taq ke dip hain KHud hi bujhte rahe KHud hi jalte rahe

raaz kaisa bhi ho raaz phir raaz hai raaz-dan main ne apna banaya nahin

maslak-e-ishq mein ye baDa jurm tha dil ke arman dil mein machalte rahe

os se pyas kis tarah bujhti meri jhulse jiwan ko KHwahish thi barsat ki

khetiyan wo jo pahle se shadab thin un pe din-raat baadal machalte rahe

rahbaron ki siyasat na kuchh puchhiye rahzanon ki hifazat na kuchh dekhiye

KHwab tiryak ke bhi sanwarte rahe sanp bhi aastinon mein palte rahe

lakh tufan aae chalin aandhiyan pattharon ki bhi barsat hoti rahi

aise ashjar bhi is chaman mein mile zulm sahte rahe aur phisalte rahe

aag firqa-parasti ki aisi lagi jo na ab tak kisi ke bujhae bujhi

rahnuma amn ka swang rachte rahe aur gharon se janaze nikalte rahe

kis qadar ban gae aaj wo sang-dil jin ke hathon mein patthar kabhi mom tha

ye na un ki samajh mein 'zuhur' aa saka kitne suraj andhere nigalte rahe