ruKH se fitrat ke hijabaat uTha deta hai

ruḳh se fitrat ke hijābāt uThā detā hai

aa.ina TuuT ke patthar ko sadā detā hai

azmat-e-ahl-e-vafā aur baḌhā detā hai

ġham-e-musalsal ho to phir ġham bhī mazā detā hai

dil dhaḌaktā hai to pahroñ nahīñ sone detā

niiñd aatī hai to ehsās jagā detā hai

tum ne shāyad kabhī is baat ko sochā hogā

vaqt hāthoñ kī lakīreñ bhī miTā detā hai

jo mire qatl ke darpai thā na jaane kab se

aaj vo bhī mujhe jiine kī duā detā hai

apne kirdār pe maujoñ ko bhī sharm aatī hai

jab koī Duub ke sāhil kā patā detā hai

ġham kī taufīq bhī sab ko nahīñ miltī 'gauhar'

ye vo ne.amat hai jo mushkil se ḳhudā detā hai

ruKH se fitrat ke hijabaat uTha deta hai

aaina TuT ke patthar ko sada deta hai

azmat-e-ahl-e-wafa aur baDha deta hai

gham-e-musalsal ho to phir gham bhi maza deta hai

dil dhaDakta hai to pahron nahin sone deta

nind aati hai to ehsas jaga deta hai

tum ne shayad kabhi is baat ko socha hoga

waqt hathon ki lakiren bhi miTa deta hai

jo mere qatl ke darpai tha na jaane kab se

aaj wo bhi mujhe jine ki dua deta hai

apne kirdar pe maujon ko bhi sharm aati hai

jab koi Dub ke sahil ka pata deta hai

gham ki taufiq bhi sab ko nahin milti 'gauhar'

ye wo neamat hai jo mushkil se KHuda deta hai