sahil se tabiat ghabrai maujon mein safina chhoD diya

sāhil se tabī.at ghabrā.ī maujoñ meñ safīna chhoḌ diyā

jiine kī lagan meñ ham hī ne jiine kā qarīna chhoḌ diyā

dāman meñ lagā.ī aag idhar ab un ke karam ko kyā kahiye

tūfān kā ruḳh thā jis ruḳh par kashtī kā udhar ruḳh moḌ diyā

the saath asīr-e-fasl-e-junūñ rāhoñ meñ na jaane kyā guzrī

kyā kahiye ki kis ne saath diyā kyā kahiye ki kis ne chhoḌ diyā

jiine na diyā apnoñ ne hameñ yuuñ zor bhī dil par chal jaatā

kuchh baat hī aisī thī ham ne ik shīsha-e-dil bhī toḌ diyā

chāhā na hamīñ ne varna ye sab chāñd sitāre jhuk jaate

kuchh vaj.h-e-sukūn-e-dil ke liye ham ne vo sahārā chhoḌ diyā

nāzuk thā bahut gulshan kā chalan nāzuk thā bahut ā.īn-e-chaman

phūloñ kī tamannā ham ne na kī kāñToñ hī se rishta joḌ diyā

ro ro ke guzārī shab vaise jab sub.h-e-chaman meñ aañkh khulī

ahbāb-e-vatan ne ai 'tahsīn' mai-ḳhāna-e-yārāñ chhoḌ diyā

sahil se tabiat ghabrai maujon mein safina chhoD diya

jine ki lagan mein hum hi ne jine ka qarina chhoD diya

daman mein lagai aag idhar ab un ke karam ko kya kahiye

tufan ka ruKH tha jis ruKH par kashti ka udhar ruKH moD diya

the sath asir-e-fasl-e-junun rahon mein na jaane kya guzri

kya kahiye ki kis ne sath diya kya kahiye ki kis ne chhoD diya

jine na diya apnon ne hamein yun zor bhi dil par chal jata

kuchh baat hi aisi thi hum ne ek shisha-e-dil bhi toD diya

chaha na hamin ne warna ye sab chand sitare jhuk jate

kuchh wajh-e-sukun-e-dil ke liye hum ne wo sahaara chhoD diya

nazuk tha bahut gulshan ka chalan nazuk tha bahut aain-e-chaman

phulon ki tamanna hum ne na ki kanTon hi se rishta joD diya

ro ro ke guzari shab waise jab subh-e-chaman mein aankh khuli

ahbab-e-watan ne ai 'tahsin' mai-KHana-e-yaran chhoD diya