sans un ke mariz-e-hasrat ki ruk ruk ke chalti jati hai

saañs un ke marīz-e-hasrat kī ruk ruk ke chaltī jaatī hai

māyūs nazar hai dar kī taraf aur jaan nikaltī jaatī hai

chehre se saraktī jaatī hai zulf un kī ḳhvāb ke aalam meñ

vo haiñ ki abhī tak hosh nahīñ aur shab hai ki Dhaltī jaatī hai

allāh ḳhabar bijlī ko na ho gulchīñ kī nigāh-e-bad na paḌe

jis shāḳh pe tinke rakkhe haiñ vo phūltī-phaltī jaatī hai

aariz pe numāyāñ ḳhaal hue phir sabza-e-ḳhat āġhāz huā

qur.āñ to haqīqat meñ hai vahī tafsīr badaltī jaatī hai

tauhīn-e-mohabbat bhī na rahī vo jaur-o-sitam bhī chhūT ga.e

pahle kī ba-nisbat husn kī ab har baat badaltī jaatī hai

laaj apnī masīhā ne rakh lī marne na diyā bīmāroñ ko

jo maut na Talne vaalī thī vo maut bhī Taltī jaatī hai

hai bazm-e-jahāñ meñ nā-mumkin be-ishq salāmat husn rahe

parvāne to jal kar ḳhaak hue ab sham.a bhī jaltī jaatī hai

shikva bhī agar maiñ kartā huuñ to jaur-e-falak kā kartā huuñ

be-vaj.h 'qamar' tāroñ kī nazar kyuuñ mujh se badaltī jaatī hai

sans un ke mariz-e-hasrat ki ruk ruk ke chalti jati hai

mayus nazar hai dar ki taraf aur jaan nikalti jati hai

chehre se sarakti jati hai zulf un ki KHwab ke aalam mein

wo hain ki abhi tak hosh nahin aur shab hai ki Dhalti jati hai

allah KHabar bijli ko na ho gulchin ki nigah-e-bad na paDe

jis shaKH pe tinke rakkhe hain wo phulti-phalti jati hai

aariz pe numayan KHal hue phir sabza-e-KHat aaghaz hua

quran to haqiqat mein hai wahi tafsir badalti jati hai

tauhin-e-mohabbat bhi na rahi wo jaur-o-sitam bhi chhuT gae

pahle ki ba-nisbat husn ki ab har baat badalti jati hai

laj apni masiha ne rakh li marne na diya bimaron ko

jo maut na Talne wali thi wo maut bhi Talti jati hai

hai bazm-e-jahan mein na-mumkin be-ishq salamat husn rahe

parwane to jal kar KHak hue ab shama bhi jalti jati hai

shikwa bhi agar main karta hun to jaur-e-falak ka karta hun

be-wajh 'qamar' taron ki nazar kyun mujh se badalti jati hai