sabaat dil tha magar be-qarar ho gaya tha

sabāt dil thā magar be-qarār ho gayā thā

vo nuur merī harārat se naar ho gayā thā

havā chalī hī nahīñ ai mahāz-e-rāhguzar

vagarna ḳhaak kā putlā ġhubār ho gayā thā

jab us kī dhuup ne dekhī hamārī surye-mukhī

hamārā naam guloñ meñ shumār ho gayā thā

kahāñ ḳhabar thī ki ye marhala bhī mushkil hai

ki maiñ to pahlī hī koshish meñ paar ho gayā thā

patā chalā ki koī dil thā dil ke andar bhī

kisī kā ġham meñ mire intishār ho gayā thā

ḳhunuk se qatl huī ik sadā-e-tīr-kushī

bas itnī baat thī merā shikār ho gayā thā

hazār haif ke mub.ham huī mirī duniyā

hazār shukr ki tū āshkār ho gayā thā

hazār haif ki pazhmurda ho ga.iiñ āñkheñ

hazār shukr tirā intizār ho gayā thā

sabaat dil tha magar be-qarar ho gaya tha

wo nur meri hararat se nar ho gaya tha

hawa chali hi nahin ai mahaz-e-rahguzar

wagarna KHak ka putla ghubar ho gaya tha

jab us ki dhup ne dekhi hamari surye-mukhi

hamara nam gulon mein shumar ho gaya tha

kahan KHabar thi ki ye marhala bhi mushkil hai

ki main to pahli hi koshish mein par ho gaya tha

pata chala ki koi dil tha dil ke andar bhi

kisi ka gham mein mere intishaar ho gaya tha

KHunuk se qatl hui ek sada-e-tir-kushi

bas itni baat thi mera shikar ho gaya tha

hazar haif ke mubham hui meri duniya

hazar shukr ki tu aashkar ho gaya tha

hazar haif ki pazhmurda ho gain aankhen

hazar shukr tera intizar ho gaya tha