sadme se shab-e-hijr ke kab jaan bar aai

sadme se shab-e-hijr ke kab jaan bar aa.ī

ye shaam nahīñ aa.ī qazā hī magar aa.ī

dekhā mirā bistar jo kal us shoḳh ne ḳhālī

har chand kiyā zabt magar aañkh bhar aa.ī

kartā hai ka.ī din se mire qatl kī tadbīr

sad-shukr ki us but kī tabī.at idhar aa.ī

aate hī tire aa ga.ī ik jaan sī tan meñ

ai nig.hat-e-gesu-e-mo.ambar kidhar aa.ī

tasvīr-e-ḳhyālī kī tirī kyā kahūñ shoḳhī

gah chhup ga.ī nazroñ se to gaahe nazar aa.ī

gulshan meñ ḳhizāñ aa.ī to bulbul ye pukārī

ab fasl-e-bahārī gul-e-dāġh-e-jigar aa.ī

turbat pe chaḌhāne ko tire soḳhtagāñ ke

le ke par-e-parvāna nasīm-e-sahar aa.ī

har tār-e-nihānī hī ko samjhā maiñ rag-e-gul

yaad us gul-e-nāzuk kī jo mujh ko magar aa.ī

pūchho to ‘zamīr’-e-jigar-afgār kahāñ hai

jis din se gayā vo na phir us kī ḳhabar aa.ī

sadme se shab-e-hijr ke kab jaan bar aai

ye sham nahin aai qaza hi magar aai

dekha mera bistar jo kal us shoKH ne KHali

har chand kiya zabt magar aankh bhar aai

karta hai kai din se mere qatl ki tadbir

sad-shukr ki us but ki tabiat idhar aai

aate hi tere aa gai ek jaan si tan mein

ai nighat-e-gesu-e-moambar kidhar aai

taswir-e-KHyali ki teri kya kahun shoKHi

gah chhup gai nazron se to gahe nazar aai

gulshan mein KHizan aai to bulbul ye pukari

ab fasl-e-bahaari gul-e-dagh-e-jigar aai

turbat pe chaDhane ko tere soKHtagan ke

le ke par-e-parwana nasim-e-sahar aai

har tar-e-nihani hi ko samjha main rag-e-gul

yaad us gul-e-nazuk ki jo mujh ko magar aai

puchho to ‘zamir’-e-jigar-afgar kahan hai

jis din se gaya wo na phir us ki KHabar aai