safar mein zindagi ke hum unhen rahbar samajhte hain

safar meñ zindagī ke ham unheñ rahbar samajhte haiñ

jo sang-e-rāh ko phūloñ hī kā bistar samajhte haiñ

bashar ne hī nahīñ samjhe rumūz-e-gardish-e-paiham

rumūz-e-gardish-e-paiham mah-o-aḳhtar samajhte haiñ

ilāhī rāz-e-hastī ek aisā raaz hai jis ko

na dīvāne samajhte haiñ na dānish-var samajhte haiñ

ḳhayāloñ se hī sachchā.ī kā andāza nahīñ hotā

ki manzar dekhne vaale hī pas-manzar samajhte haiñ

haqīqat ko samajhne meñ ḳhudī kā zo'm haa.il hai

haqīqat ham matā'-e-be-ḳhudī pā kar samajhte haiñ

bashar ne jang kā maidāñ banāyā hai inheñ varna

parinde mandir-o-masjid ko apnā ghar samajhte haiñ

junūn-e-'ishq ke māroñ kī ḳhūbī hai yahī 'gauhar'

vo har bedād-gar ko apnā chārāgar samajhte haiñ

safar mein zindagi ke hum unhen rahbar samajhte hain

jo sang-e-rah ko phulon hi ka bistar samajhte hain

bashar ne hi nahin samjhe rumuz-e-gardish-e-paiham

rumuz-e-gardish-e-paiham mah-o-aKHtar samajhte hain

ilahi raaz-e-hasti ek aisa raaz hai jis ko

na diwane samajhte hain na danish-war samajhte hain

KHayalon se hi sachchai ka andaza nahin hota

ki manzar dekhne wale hi pas-manzar samajhte hain

haqiqat ko samajhne mein KHudi ka zo'm hail hai

haqiqat hum mata'-e-be-KHudi pa kar samajhte hain

bashar ne jang ka maidan banaya hai inhen warna

parinde mandir-o-masjid ko apna ghar samajhte hain

junun-e-'ishq ke maron ki KHubi hai yahi 'gauhar'

wo har bedad-gar ko apna chaaragar samajhte hain