sainkaDon sae magar ek aashna chehra na tha

saiñkaḌoñ saa.e magar ik āshnā chehra na thā

jagmagāte shahr meñ mujh sā koī tanhā na thā

jis ne jhāñkā raat mujh ko aa.ine kī oT se

jaanā pahchānā lagā pahle kabhī dekhā na thā

mujh se pahle bhī bahut se ahl-e-dil rusvā hue

shahr meñ lekin kabhī itnā tirā shohrā na thā

har kalī kī aañkh meñ bhīge dhuñdalke chhā ga.e

vaqt kī āñkhoñ meñ kājal shaam kā phailā na thā

habs bhī thā ek vahshat-nāk sannāTe ke saath

dam-ba-ḳhud har shāḳh thī pattā koī hiltā na thā

kaun sī dīmak badan se ruuh tak chaT kar ga.ī

ab huuñ jitnā khokhlā pahle kabhī itnā na thā

jis ne rusvā kar diyā 'akram' bhare bāzār meñ

sochtā huuñ us se kyā merā koī rishta na thā

sainkaDon sae magar ek aashna chehra na tha

jagmagate shahr mein mujh sa koi tanha na tha

jis ne jhanka raat mujh ko aaine ki oT se

jaana pahchana laga pahle kabhi dekha na tha

mujh se pahle bhi bahut se ahl-e-dil ruswa hue

shahr mein lekin kabhi itna tera shohra na tha

har kali ki aankh mein bhige dhundalke chha gae

waqt ki aankhon mein kajal sham ka phaila na tha

habs bhi tha ek wahshat-nak sannaTe ke sath

dam-ba-KHud har shaKH thi patta koi hilta na tha

kaun si dimak badan se ruh tak chaT kar gai

ab hun jitna khokhla pahle kabhi itna na tha

jis ne ruswa kar diya 'akram' bhare bazar mein

sochta hun us se kya mera koi rishta na tha