samay kahan tha ki hum teri aarzu karte

samay kahāñ thā ki ham terī aarzū karte

hayāt biit ga.ī apnī justujū karte

talāsh-e-yār-e-tarahdār kū-ba-kū karte

taras gayā huuñ tamannā-e-rang-o-bū karte

jamāl dekh ke terā araq araq hotā

agar tujhe kabhī ham gul ke rū-barū karte

ye aur baat ki maiñ sarfarāz ho na sakā

tamām umr kaTī koshish-e-numū karte

tumhāre dil ke bharam aur bhed khul na sake

kabhī to ham se bhī tum khul ke guftugū karte

agar ye jānte ham terā dil na pighlegā

tirī talāsh meñ kyoñ apnā dil lahū karte

ba-faiz-e-hosh agar apnā ġham ġhalat hotā

kabhī na ārzū-e-sāġhar-o-subū karte

panap na paa.e rivāyat-parast suukh ga.e

qadīm rang kī taqlīd hū-bahū karte

duā-e-maġhfirat-e-dil qubūl ho jaatī

jo ashk-hā-e-nadāmat se ham vuzū karte

adā-e-nāz se komal badan kī ḳhushbū se

mujhe jo aap sar-afrāz surḳh-rū karte

hameñ urūj-o-farāz-e-junūñ kahāñ miltā

agar na ishq meñ nīlām aabrū karte

havas hamārī mohabbat se bhī ubhar aa.ī

kahāñ tak apnī kasāfat kī shust-o-shū karte

ba-rang-e-'mīr' chamak uThte ‘krishn-mohan’ ham

jo sarf ḳhuun ġhazal meñ kabhū kabhū karte

samay kahan tha ki hum teri aarzu karte

hayat bit gai apni justuju karte

talash-e-yar-e-tarahdar ku-ba-ku karte

taras gaya hun tamanna-e-rang-o-bu karte

jamal dekh ke tera araq araq hota

agar tujhe kabhi hum gul ke ru-baru karte

ye aur baat ki main sarfaraaz ho na saka

tamam umr kaTi koshish-e-numu karte

tumhaare dil ke bharam aur bhed khul na sake

kabhi to hum se bhi tum khul ke guftugu karte

agar ye jaante hum tera dil na pighlega

teri talash mein kyon apna dil lahu karte

ba-faiz-e-hosh agar apna gham ghalat hota

kabhi na aarzu-e-saghar-o-subu karte

panap na pae riwayat-parast sukh gae

qadim rang ki taqlid hu-bahu karte

dua-e-maghfirat-e-dil qubul ho jati

jo ashk-ha-e-nadamat se hum wuzu karte

ada-e-naz se komal badan ki KHushbu se

mujhe jo aap sar-afraaz surKH-ru karte

hamein uruj-o-faraaz-e-junun kahan milta

agar na ishq mein nilam aabru karte

hawas hamari mohabbat se bhi ubhar aai

kahan tak apni kasafat ki shust-o-shu karte

ba-rang-e-'mir' chamak uThte ‘krishn-mohan’ hum

jo sarf KHun ghazal mein kabhu kabhu karte