sambhlen to machalte rahte hain

sambhleñ to machalte rahte haiñ

machleñ to sañbhalte rahte haiñ

ham log kaThin rāhoñ par bhī

hañste hue chalte rahte haiñ

is kaif-o-rang kī duniyā meñ

armān machalte rahte haiñ

nis-din apne man nainan meñ

kuchh sapne palte rahte haiñ

ye hastī hai har roz na.ī

ham āñkheñ malte rahte haiñ

ye sach hai apne zehn-o-dil

machleñ to bahalte rahte haiñ

ham sham.a kī sūrat rātoñ ko

be-ḳhvāb pighalte rahte haiñ

siine meñ āshāoñ ke diye

har rang meñ jalte rahte haiñ

jo har dam ranj-o-rāhat ke

sāñchoñ meñ Dhalte rahte haiñ

har rang hameñ raas aatā hai

yuuñ phūlte phalte rahte haiñ

rangoñ kā lutf uThāne ko

ham rang badalte rahte haiñ

pathrā.ī huī āñkhoñ se kyoñ

favvāre ubalte rahte haiñ

hairāñ huuñ sard ehsās se bhī

kyoñ sho.ale nikalte rahte haiñ

mere liye shītal bādal bhī

ik aag ugalte rahte haiñ

kyoñ vaqt kī lau sañvlāne ko

ham log machalte rahte haiñ

ham to lamhoñ ke patangoñ ko

din raat masalte rahte haiñ

ham 'krishn-mohan' mastī meñ

har aan machalte rahte haiñ

sambhlen to machalte rahte hain

machlen to sanbhalte rahte hain

hum log kaThin rahon par bhi

hanste hue chalte rahte hain

is kaif-o-rang ki duniya mein

arman machalte rahte hain

nis-din apne man nainan mein

kuchh sapne palte rahte hain

ye hasti hai har roz nai

hum aankhen malte rahte hain

ye sach hai apne zehn-o-dil

machlen to bahalte rahte hain

hum shama ki surat raaton ko

be-KHwab pighalte rahte hain

sine mein aashaon ke diye

har rang mein jalte rahte hain

jo har dam ranj-o-rahat ke

sanchon mein Dhalte rahte hain

har rang hamein ras aata hai

yun phulte phalte rahte hain

rangon ka lutf uThane ko

hum rang badalte rahte hain

pathrai hui aankhon se kyon

fawware ubalte rahte hain

hairan hun sard ehsas se bhi

kyon shoale nikalte rahte hain

mere liye shital baadal bhi

ek aag ugalte rahte hain

kyon waqt ki lau sanwlane ko

hum log machalte rahte hain

hum to lamhon ke patangon ko

din raat masalte rahte hain

hum 'krishn-mohan' masti mein

har aan machalte rahte hain