sannaTe ke shor se phir aawazon ka sahra chamka

sannāTe ke shor se phir āvāzoñ kā sahrā chamkā

zer-e-falak jo ab tak ḳhvābīda thā vo fitna chamkā

dasht-e-havā ke dosh pe vahshī ḳhushbū ne par phailā.e

rang havā bedār añgḌā.ī saañp ne lī sho.ala chamkā

patthar shīsha chāñdī sonā motī hiirā shams qamar

hairat vahshat ḳhaak samundar paikar ā.īna chamkā

shahr-e-siyāh pe TuuTī hoñgī kaisī kaisī talvāreñ

parda-e-ḳhvāb pe guzrā manzar be-chamke kyā kyā chamkā

sāhir lashkar sabr fasīl tak aa ke rajaz-ḳhvāñ hotā hai

tū bhī hisār-e-jāñ se nikal kar ḳhanjar-e-garm-navā chamkā

raat pahāḌ pe bijlī taḌpī patthar TuuTā aag lagī

pal-bhar ko mere kamre kī khiḌkī kā shīsha chamkā

kārobār jamā hai phir se tiir tabar talvāroñ kā

muddat se jo sard paḌā thā aahoñ kā dhandā chamkā

sannaTe ke shor se phir aawazon ka sahra chamka

zer-e-falak jo ab tak KHwabida tha wo fitna chamka

dasht-e-hawa ke dosh pe wahshi KHushbu ne par phailae

rang hawa bedar angDai sanp ne li shoala chamka

patthar shisha chandi sona moti hira shams qamar

hairat wahshat KHak samundar paikar aaina chamka

shahr-e-siyah pe TuTi hongi kaisi kaisi talwaren

parda-e-KHwab pe guzra manzar be-chamke kya kya chamka

sahir lashkar sabr fasil tak aa ke rajaz-KHwan hota hai

tu bhi hisar-e-jaan se nikal kar KHanjar-e-garm-nawa chamka

raat pahaD pe bijli taDpi patthar TuTa aag lagi

pal-bhar ko mere kamre ki khiDki ka shisha chamka

karobar jama hai phir se tir tabar talwaron ka

muddat se jo sard paDa tha aahon ka dhanda chamka