sarab-e-zist se bachna to bas ke bahar tha

sarāb-e-zīst se bachnā to bas ke bāhar thā

magar jo siine pe yādoñ kā saḳht patthar thā

ham apne aap se kuchh der guftugū kar leñ

tumhārī yaad na aatī to aaj behtar thā

na qāfila na ġhubār-e-safar na saaya koī

hamāre saath to jo kuchh thā dāman-e-tar thā

ḳhayāl-o-ḳhvāb se kyūñkar junūñ ko hosh aaya

tumhārā zikr thā yā zindagī kā nashtar thā

na jaane kis liye duniyā yahī samajhtī hai

na maiñ thā dard kā maarā na tū sitamgar thā

ḳhabar na thī ki taqāzā-e-zindagī kyā hai

kisī kī bazm pe ham ko gumān-e-mahshar thā

hayāt jaatī kahāñ kis se hotī dād-talab

dil-e-hayāt kā har zaḳhm ḳhud hī ḳhanjar thā

sarab-e-zist se bachna to bas ke bahar tha

magar jo sine pe yaadon ka saKHt patthar tha

hum apne aap se kuchh der guftugu kar len

tumhaari yaad na aati to aaj behtar tha

na qafila na ghubar-e-safar na saya koi

hamare sath to jo kuchh tha daman-e-tar tha

KHayal-o-KHwab se kyunkar junun ko hosh aaya

tumhaara zikr tha ya zindagi ka nashtar tha

na jaane kis liye duniya yahi samajhti hai

na main tha dard ka mara na tu sitamgar tha

KHabar na thi ki taqaza-e-zindagi kya hai

kisi ki bazm pe hum ko guman-e-mahshar tha

hayat jati kahan kis se hoti dad-talab

dil-e-hayat ka har zaKHm KHud hi KHanjar tha