sard hawa hai nauhagar raat bahut guzar gai

sard havā hai nauhagar raat bahut guzar ga.ī

ġhaur se dekh chashm-e-tar raat bahut guzar ga.ī

niiñd meñ gum haiñ dasht-o-bāġh bujh ga.e shahr ke charāġh

aise meñ jā.ūñ maiñ kidhar raat bahut guzar ga.ī

ab to simaT rahe haiñ saa.e lauT ke vo javāñ na aa.e

dil meñ ajiib sā hai Dar raat bahut guzar ga.ī

guuñj rahī hai duur tak apne hī qadmoñ kī sadā

suunī paḌī hai rahguzar raat bahut guzar ga.ī

jashn-e-tarab huā tamām kushtā-charāġh-o-sāz-o-jām

bikhre paḌe haiñ farsh par raat bahut guzar ga.ī

mahfil-e-dostāñ se kab uThne ko chāhtā hai dil

soch rahā huuñ jā.ūñ ghar raat bahut guzar ga.ī

jaagā na ek shaḳhs bhī merī nava-e-dard se

naale ga.e haiñ be-asar raat bahut guzar ga.ī

dil meñ mire utar ga.ī sahn-e-makāñ kī tīrgī

bujh ga.ī sham.a taaq par raat bahut guzar ga.ī

ḳhauf ke saa.e chār-sū ai mire yaar māh-rū

aaj yahīñ qayām kar raat bahut guzar ga.ī

so ga.e ghar ke sab makīñ par mire intizār meñ

jaag rahe haiñ bām-o-dar raat bahut guzar ga.ī

ghar kī muñDer se ga.ī chāñd kī zard raushnī

duur nahīñ hai ab sahar raat bahut guzar ga.ī

sard hawa hai nauhagar raat bahut guzar gai

ghaur se dekh chashm-e-tar raat bahut guzar gai

nind mein gum hain dasht-o-bagh bujh gae shahr ke charagh

aise mein jaun main kidhar raat bahut guzar gai

ab to simaT rahe hain sae lauT ke wo jawan na aae

dil mein ajib sa hai Dar raat bahut guzar gai

gunj rahi hai dur tak apne hi qadmon ki sada

suni paDi hai rahguzar raat bahut guzar gai

jashn-e-tarab hua tamam kushta-charagh-o-saz-o-jam

bikhre paDe hain farsh par raat bahut guzar gai

mahfil-e-dostan se kab uThne ko chahta hai dil

soch raha hun jaun ghar raat bahut guzar gai

jaga na ek shaKHs bhi meri nawa-e-dard se

nale gae hain be-asar raat bahut guzar gai

dil mein mere utar gai sahn-e-makan ki tirgi

bujh gai shama taq par raat bahut guzar gai

KHauf ke sae chaar-su ai mere yar mah-ru

aaj yahin qayam kar raat bahut guzar gai

so gae ghar ke sab makin par mere intizar mein

jag rahe hain baam-o-dar raat bahut guzar gai

ghar ki munDer se gai chand ki zard raushni

dur nahin hai ab sahar raat bahut guzar gai