shaistagi-e-ishq ka dekhen to ye chalan

shā.istagī-e-ishq kā dekheñ to ye chalan

dāman pe aañch aa.ī nahīñ jal gayā badan

un kī karishma-sāz nigāhoñ kī baḳhshisheñ

kaafī thā ek phuul magar de diyā chaman

gar maqsad-e-hayāt ibādat hai sub.h-o-shām

phir ye jahān-e-shauq ye raunaq ye anjuman

idrāk-e-husn-e-zāt agar is ko kuchh nahīñ

phir aadmī hai apne liye ḳhud hī ahraman

jhelīñ haiñ ham ne ziist kī sau sau qabāhateñ

ham be-niyāz-e-ranj ko kyā daar kyā rasan

gulshan ke ḳhār-o-ḳhas ne rulāyā hai is qadar

gul kā bhī naam sun ke laraz jaatā hai badan

duniyā ke paas kyā hai hameñ is se kyā ġharaz

ham apnī aarzū ke khilaunoñ meñ haiñ magan

'shāriq' nahīñ mazāq ki rishta lahū kā hai

dekhī na jā.egī kabhī barbādī-e-chaman

shaistagi-e-ishq ka dekhen to ye chalan

daman pe aanch aai nahin jal gaya badan

un ki karishma-saz nigahon ki baKHshishen

kafi tha ek phul magar de diya chaman

gar maqsad-e-hayat ibaadat hai subh-o-sham

phir ye jahan-e-shauq ye raunaq ye anjuman

idrak-e-husn-e-zat agar is ko kuchh nahin

phir aadmi hai apne liye KHud hi ahraman

jhelin hain hum ne zist ki sau sau qabahaten

hum be-niyaz-e-ranj ko kya dar kya rasan

gulshan ke KHar-o-KHas ne rulaya hai is qadar

gul ka bhi nam sun ke laraz jata hai badan

duniya ke pas kya hai hamein is se kya gharaz

hum apni aarzu ke khilaunon mein hain magan

'shaariq' nahin mazaq ki rishta lahu ka hai

dekhi na jaegi kabhi barbaadi-e-chaman