shab ko uljhe the teri zulf-e-girah-gir se hum

shab ko uljhe the tirī zulf-e-girah-gīr se ham

ab pareshān haiñ usī ḳhvāb kī ta.abīr se ham

tujh se ai dost tirā tarz-e-takallum sīkhā

ḳhāmushī siikh rahe haiñ tirī tasvīr se ham

farz kī qaid se dāman jo chhuḌā leñge kabhī

phir na roke se rukeñge kisī tadbīr se ham

ashk-e-rangīñ se banāte haiñ jo dil kī tasvīr

nuur bharte haiñ tire husn kī tanvīr se ham

terī bātoñ ko har andāz se parkhā ham ne

itne vārafta na the lazzat-e-taqrīr se ham

kī hai taqdīr badalne kī bhī sa.ī-e-paiham

haif majbūr rahe aap kī tahrīr se ham

shād-o-ābād raho haal hamārā pūchhā

aur kyā kahte 'shifā' us but-e-be-pīr se ham

shab ko uljhe the teri zulf-e-girah-gir se hum

ab pareshan hain usi KHwab ki tabir se hum

tujh se ai dost tera tarz-e-takallum sikha

KHamushi sikh rahe hain teri taswir se hum

farz ki qaid se daman jo chhuDa lenge kabhi

phir na roke se rukenge kisi tadbir se hum

ashk-e-rangin se banate hain jo dil ki taswir

nur bharte hain tere husn ki tanwir se hum

teri baaton ko har andaz se parkha hum ne

itne warafta na the lazzat-e-taqrir se hum

ki hai taqdir badalne ki bhi sai-e-paiham

haif majbur rahe aap ki tahrir se hum

shad-o-abaad raho haal hamara puchha

aur kya kahte 'shifa' us but-e-be-pir se hum