sham ko apni wafa ka zarf dikhlane se hai

sham' ko apnī vafā kā zarf dikhlāne se hai

ek parvāne ko matlab jal ke mar jaane se hai

ashk piine se mire namkīn hai paanī yahāñ

ġham kī jo lazzat yahāñ hai mere ġham khāne se hai

mere hone se hī saare mai-kade ābād haiñ

sāġhar-o-mīnā kī mastī mere paimāne se hai

kuchh davā-dārū se us ko haif matlab hī nahīñ

mere chārāgar ko matlab dard baḌh jaane se hai

tere ġham kī sozisheñ haiñ mere ġham kī taab se

tere afsāne kī shohrat mere afsāne se hai

kaisī ye bāda-parastī hai tumhārī zāhido

mai to piinī hai magar parhez maiḳhāne se hai

sab pe taarī ḳhāmushī hai merī ḳhāmoshī ko sun

sab ke dil meñ shor barpā mere chillāne se hai

husn ko matlūb hai kuchh soz-o-sāz-e-'āshiqī

sham' kā charchā bhī āḳhir raqs-e-parvāne se hai

kal talak be-rang-o-bū the sab mire dīvār-o-dar

aaj āñgan meñ ye raunaq tere aa jaane se hai

mere hī fart-e-junūñ se zindagānī hai 'sahar'

aur sukūt-e-bazm-e-hastī mere mar jaane se hai

sham' ko apni wafa ka zarf dikhlane se hai

ek parwane ko matlab jal ke mar jaane se hai

ashk pine se mere namkin hai pani yahan

gham ki jo lazzat yahan hai mere gham khane se hai

mere hone se hi sare mai-kade aabaad hain

saghar-o-mina ki masti mere paimane se hai

kuchh dawa-daru se us ko haif matlab hi nahin

mere chaaragar ko matlab dard baDh jaane se hai

tere gham ki sozishen hain mere gham ki tab se

tere afsane ki shohrat mere afsane se hai

kaisi ye baada-parasti hai tumhaari zahido

mai to pini hai magar parhez maiKHane se hai

sab pe tari KHamushi hai meri KHamoshi ko sun

sab ke dil mein shor barpa mere chillane se hai

husn ko matlub hai kuchh soz-o-saz-e-'ashiqi

sham' ka charcha bhi aaKHir raqs-e-parwane se hai

kal talak be-rang-o-bu the sab mere diwar-o-dar

aaj aangan mein ye raunaq tere aa jaane se hai

mere hi fart-e-junun se zindagani hai 'sahar'

aur sukut-e-bazm-e-hasti mere mar jaane se hai