shikast-e-ruh se pahle sahar nahin hoti

shikast-e-rūh se pahle sahar nahīñ hotī

tamām umr shab-e-ġham basar nahīñ hotī

hujūm-e-yās ke maare hue kidhar jaa.eñ

har ek raah tirī rahguzar nahīñ hotī

ba-har-maqām vo rahte haiñ bā-ḳhabar ham se

aur is tarah ki hameñ bhī ḳhabar nahīñ hotī

kabhī asar ba-lihāz-e-duā nahīñ rahtā

kabhī duā hī ba-qadr-e-asar nahīñ hotī

ye inqilāb-e-zamāna ki dam-ba-dam paidā

ye zindagī ki idhar se udhar nahīñ hotī

tulū-e-sub.h kī ummīd ne hameñ 'ishrat'

vo raat dī jo kisī se basar nahīñ hotī

shikast-e-ruh se pahle sahar nahin hoti

tamam umr shab-e-gham basar nahin hoti

hujum-e-yas ke mare hue kidhar jaen

har ek rah teri rahguzar nahin hoti

ba-har-maqam wo rahte hain ba-KHabar hum se

aur is tarah ki hamein bhi KHabar nahin hoti

kabhi asar ba-lihaz-e-dua nahin rahta

kabhi dua hi ba-qadr-e-asar nahin hoti

ye inqilab-e-zamana ki dam-ba-dam paida

ye zindagi ki idhar se udhar nahin hoti

tulu-e-subh ki ummid ne hamein 'ishrat'

wo raat di jo kisi se basar nahin hoti