sunaen ja ke kise apni dastan hum tum

sunā.eñ jā ke kise apnī dāstāñ ham tum

ḳhud apnā raaz haiñ ḳhud apne rāz-dāñ ham tum

ab aa mile haiñ to ik dūsre meñ kho jaa.eñ

bhaTak chuke haiñ bahut din yahāñ vahāñ ham tum

sameT laa.e haiñ ḳhud ko to dhyān aatā hai

bikhar ga.e the na jaane kahāñ kahāñ ham tum

qadam qadam pe vo duniyā kī āzmā.ish thī

ki le rahe the ḳhud apnā hī imtihāñ ham tum

haqīqatoñ se to ye ḳhvāb ḳhūbsūrat haiñ

guzār deñ inhīñ ḳhvāboñ ke darmiyāñ ham tum

safar meñ us kā ye kahnā thā har qadam pe 'nasīm'

ki rahguzar ko banā deñge kahkashāñ ham tum

sunaen ja ke kise apni dastan hum tum

KHud apna raaz hain KHud apne raaz-dan hum tum

ab aa mile hain to ek dusre mein kho jaen

bhaTak chuke hain bahut din yahan wahan hum tum

sameT lae hain KHud ko to dhyan aata hai

bikhar gae the na jaane kahan kahan hum tum

qadam qadam pe wo duniya ki aazmaish thi

ki le rahe the KHud apna hi imtihan hum tum

haqiqaton se to ye KHwab KHubsurat hain

guzar den inhin KHwabon ke darmiyan hum tum

safar mein us ka ye kahna tha har qadam pe 'nasim'

ki rahguzar ko bana denge kahkashan hum tum