tere jaane se hua dil dasht-e-viran ki tarah

tere jaane se huā dil dasht-e-vīrāñ kī tarah

shahr saarā lagtā hai ujḌe gulistāñ kī tarah

maiñ ne māñgā hai du'āoñ meñ tumheñ taqdīr se

tum dil-o-jāñ meñ base ho jān-e-jānāñ kī tarah

qalb-e-muztar meñ tire dīdār kī hasrat liye

bas tirī dahlīz par baiThā huuñ darbāñ kī tarah

maiñ ne kyā kyā ḳhvāb dekhe haiñ tumhārī diid ke

baam par aao kabhī tum māh-e-tābāñ kī tarah

ġhair ko bosa-zanī karte hue dekhā hai jab

aa.ina taktā rahā huuñ maiñ pashemāñ kī tarah

rasm-e-ulfat se nahīñ ho āshnā tum bevafā

tum vafā bhī karte ho to ek ehsāñ kī tarah

kyā batā.ūñ kaise samjhā.ūñ masā.il kitne haiñ

zindagī uljhī huī hai zulf-e-pechāñ kī tarah

harsū ranj-o-ġham kā 'ālam aur afrā-tafrī hai

shor barpā hai yahāñ shām-e-ġharībāñ kī tarah

saarī duniyā dekhī maiñ ne jasta jasta bā-ḳhudā

koī chehra hī nahīñ aayā nazar maañ kī tarah

zindagī ne aisī karvaT lī hai 'ash.har' kyā kahūñ

ab to apne ghar meñ bhī rahtā huuñ mehmāñ kī tarah

tere jaane se hua dil dasht-e-viran ki tarah

shahr sara lagta hai ujDe gulistan ki tarah

main ne manga hai du'aon mein tumhein taqdir se

tum dil-o-jaan mein base ho jaan-e-jaanan ki tarah

qalb-e-muztar mein tere didar ki hasrat liye

bas teri dahliz par baiTha hun darban ki tarah

main ne kya kya KHwab dekhe hain tumhaari did ke

baam par aao kabhi tum mah-e-taban ki tarah

ghair ko bosa-zani karte hue dekha hai jab

aaina takta raha hun main pasheman ki tarah

rasm-e-ulfat se nahin ho aashna tum bewafa

tum wafa bhi karte ho to ek ehsan ki tarah

kya bataun kaise samjhaun masail kitne hain

zindagi uljhi hui hai zulf-e-pechan ki tarah

harsu ranj-o-gham ka 'alam aur afra-tafri hai

shor barpa hai yahan sham-e-ghariban ki tarah

sari duniya dekhi main ne jasta jasta ba-KHuda

koi chehra hi nahin aaya nazar man ki tarah

zindagi ne aisi karwaT li hai 'ashhar' kya kahun

ab to apne ghar mein bhi rahta hun mehman ki tarah