tujh bin to kabhi gul ke tain bu na karun main

tujh bin to kabhī gul ke ta.iiñ bū na karūñ maiñ

mar jā.ūñ pa gulshan kī taraf rū na karūñ maiñ

gar ja.ad ko sumbul kī sabā bechne laave

ḳhātir se tirī qīmat-e-yak-mū na karūñ maiñ

palle meñ tire husn ke go ho vo girāñ-tar

yūsuf ko tirā sañg-e-tarāzū na karūñ maiñ

yuuñ dil ko giraftār rakhūñ said-e-alam meñ

par aur kā said-e-ḳham-e-gesū na karūñ maiñ

gar hūr-o-parī dil ko lubhāve mire aa kar

vallāh ki us par kabhī jaadū na karūñ maiñ

gar marsiya-ḳhvānī pe dil aave kabhī merā

tū hove to dā.ūd ko baazū na karūñ maiñ

huuñ bas-ki havā-dār tirī ātish-e-ġham kā

phuñk jaa.e jo siina to kabhū hū na karūñ maiñ

yuuñ dekhūñ to dekhūñ kisī ḳhush-vaz.a ko lekin

ḳhvāhish kī nazar bar-ruḳh-e-nekū na karūñ maiñ

bulbul kī tarah gul pe na huuñ zamzama-parvāz

qumrī kī tarah sarv pe kū kū na karūñ maiñ

jab raat ho zaanū pe rakho apne sar apnā

par takiya-e-sar ġhair kā zaanū na karūñ maiñ

mehrāb ke ka.abe kā namāzī huuñ to vaañ bhī

juz sajda-e-tāq-e-ḳham-e-abrū na karūñ maiñ

jab tak na khuleñ mujh se tire husn ke uqde

hargiz havas-e-nāfa-e-āhū na karūñ maiñ

ham-ḳhvāba agar hove mirī hūr-e-bahishtī

īdhar se udhar ko kabhī pahlū na karūñ maiñ

koī aur to kab mujh ko lubhā saktā hai lekin

Dartā huuñ tasavvur se tire ḳhū na karūñ maiñ

ai 'mus.hafī' hai ahd ki jab tak na vo gul ho

gul-gasht-e-gul o sair-e-lab-e-jū na karūñ maiñ

tujh bin to kabhi gul ke tain bu na karun main

mar jaun pa gulshan ki taraf ru na karun main

gar jad ko sumbul ki saba bechne lawe

KHatir se teri qimat-e-yak-mu na karun main

palle mein tere husn ke go ho wo giran-tar

yusuf ko tera sang-e-taraazu na karun main

yun dil ko giraftar rakhun said-e-alam mein

par aur ka said-e-KHam-e-gesu na karun main

gar hur-o-pari dil ko lubhawe mere aa kar

wallah ki us par kabhi jadu na karun main

gar marsiya-KHwani pe dil aawe kabhi mera

tu howe to daud ko bazu na karun main

hun bas-ki hawa-dar teri aatish-e-gham ka

phunk jae jo sina to kabhu hu na karun main

yun dekhun to dekhun kisi KHush-waza ko lekin

KHwahish ki nazar bar-ruKH-e-neku na karun main

bulbul ki tarah gul pe na hun zamzama-parwaz

qumri ki tarah sarw pe ku ku na karun main

jab raat ho zanu pe rakho apne sar apna

par takiya-e-sar ghair ka zanu na karun main

mehrab ke kabe ka namazi hun to wan bhi

juz sajda-e-taq-e-KHam-e-abru na karun main

jab tak na khulen mujh se tere husn ke uqde

hargiz hawas-e-nafa-e-ahu na karun main

ham-KHwaba agar howe meri hur-e-bahishti

idhar se udhar ko kabhi pahlu na karun main

koi aur to kab mujh ko lubha sakta hai lekin

Darta hun tasawwur se tere KHu na karun main

ai 'mushafi' hai ahd ki jab tak na wo gul ho

gul-gasht-e-gul o sair-e-lab-e-ju na karun main