tumhaari zulf ka dil se muqabla na gaya

tumhārī zulf kā dil se muqābla na gayā

hamāre sar se ye saudā ye silsila na gayā

agarche jaañ se ga.e bārhā mohabbat meñ

shikast-e-fāsh pe bhī vaise hausla na gayā

haTā ke zulf-e-pareshāñ vo ruḳh se yuuñ bole

kabhī ye shām-o-sahar hī kā fāsla na gayā

havā-e-bāda-e-māshūq ab bhī baaqī hai

shabāb jaane pe bhī dil kā valvala na gayā

bujhā.ī pyaas na kab is se ḳhār-e-sahrā kī

maiñ apne paañv kā kab le ke aabla na gayā

yahāñ jafā kā vafā kā vahāñ rahā shikva

hamāre un ke diloñ se yahī gila na gayā

yahāñ hamesha ajal Dāltī rahī Daakā

adam ko kaun se din luT ke qāfila na gayā

tirī hī teġh-e-jafā ke ye nīm-bismil haiñ

dil-o-jigar kā kabhī kar ke faisla na gayā

nikal gayā thā vo khoTā hamārā dil le kar

hamīñ khare the jo us se mo.āmla na gayā

jo dil kā chaak siyā to jigar huā TukḌe

tamām umr yahī apnā mashġhala na gayā

vazīfa-ḳhvār hai ye bārgāh kā us kī

ḳhudā ke ghar se kabhī 'sabr' kā sila na gayā

tumhaari zulf ka dil se muqabla na gaya

hamare sar se ye sauda ye silsila na gaya

agarche jaan se gae barha mohabbat mein

shikast-e-fash pe bhi waise hausla na gaya

haTa ke zulf-e-pareshan wo ruKH se yun bole

kabhi ye sham-o-sahar hi ka fasla na gaya

hawa-e-baada-e-mashuq ab bhi baqi hai

shabab jaane pe bhi dil ka walwala na gaya

bujhai pyas na kab is se KHar-e-sahra ki

main apne panw ka kab le ke aabla na gaya

yahan jafa ka wafa ka wahan raha shikwa

hamare un ke dilon se yahi gila na gaya

yahan hamesha ajal Dalti rahi Daka

adam ko kaun se din luT ke qafila na gaya

teri hi tegh-e-jafa ke ye nim-bismil hain

dil-o-jigar ka kabhi kar ke faisla na gaya

nikal gaya tha wo khoTa hamara dil le kar

hamin khare the jo us se moamla na gaya

jo dil ka chaak siya to jigar hua TukDe

tamam umr yahi apna mashghala na gaya

wazifa-KHwar hai ye bargah ka us ki

KHuda ke ghar se kabhi 'sabr' ka sila na gaya