tumhein mil kar bhi aksar dil ke arman dil mein rahte hain

tumheñ mil kar bhī aksar dil ke armāñ dil meñ rahte haiñ

tumhāre chāhne vaale baḌī mushkil meñ rahte haiñ

use nāshād karne kā use barbād karne kā

gila hai to unhīñ se hai jo mere dil meñ rahte haiñ

razākārān-e-ulfat maut se hargiz nahīñ Darte

hameñ dekho ki har dam kūcha-e-qātil meñ rahte haiñ

junūñ kī ḳhām-kārī chain lene hī nahīñ detī

ham un ko DhūñDte haiñ jo hamāre dil meñ rahte haiñ

talāsh-e-yār kī fursat agar hogī to kar leñge

abhī to raat din ham justujū-e-dil meñ rahte haiñ

kabhī to ġhaur kar leñ qissa-e-ḳhizr-o-sikandar par

vo rahrav jo talāsh-e-rahbar-e-kāmil meñ rahte haiñ

hamīñ ko ai ḳhudā kuchh ho gayā hai yā zamāne ko

hamāre hī gile-shikve har ik mahfil meñ rahte haiñ

dil-e-bīmār kī hālat na badlī hai na badlegī

hamāre chārāgar kyoñ sa.i-e-lā-hāsil meñ rahte haiñ

dil-e-nādāñ kī aadat se bahut bezār huuñ 'sāhir'

ye hazrat har-ghaḌī ik fikr-e-lā-hāsil meñ rahte haiñ

tumhein mil kar bhi aksar dil ke arman dil mein rahte hain

tumhaare chahne wale baDi mushkil mein rahte hain

use nashad karne ka use barbaad karne ka

gila hai to unhin se hai jo mere dil mein rahte hain

razakaran-e-ulfat maut se hargiz nahin Darte

hamein dekho ki har dam kucha-e-qatil mein rahte hain

junun ki KHam-kari chain lene hi nahin deti

hum un ko DhunDte hain jo hamare dil mein rahte hain

talash-e-yar ki fursat agar hogi to kar lenge

abhi to raat din hum justuju-e-dil mein rahte hain

kabhi to ghaur kar len qissa-e-KHizr-o-sikandar par

wo rahraw jo talash-e-rahbar-e-kaamil mein rahte hain

hamin ko ai KHuda kuchh ho gaya hai ya zamane ko

hamare hi gile-shikwe har ek mahfil mein rahte hain

dil-e-bimar ki haalat na badli hai na badlegi

hamare chaaragar kyon sai-e-la-hasil mein rahte hain

dil-e-nadan ki aadat se bahut bezar hun 'sahir'

ye hazrat har-ghaDi ek fikr-e-la-hasil mein rahte hain