tumhein shauq-e-manzil mein chalna paDega

tumheñ shauq-e-manzil meñ chalnā paḌegā

gire ho to gir kar sañbhalnā paḌegā

jahāñ meñ vafā kā chalan aam kar ke

nizām-e-jafā ko badalnā paḌegā

guhar-hā-e-maqsūd gar chāhte ho

havādis ke tūfāñ meñ palnā paḌegā

bachānī hai tūfāñ se gar apnī kashtī

havāoñ ke ruḳh ko badalnā paḌegā

nahīñ mai-kade meñ koī nazm baaqī

hameñ apnā saaqī badalnā paḌegā

na gar ḳhvāb-e-ġhaflat se chauñke to tum ko

nadāmat se hāthoñ ko malnā paḌegā

jahālat ta.assub va firqa-parastī

ye daldal hai is se nikalnā paḌegā

the ham raunaq-e-bazm ye kyā ḳhabar thī

kabhī sham.a ban kar pighalnā paḌegā

jinhoñ ne sajā.ī thī ye terī mahfil

ġhazab hai unhī ko nikalnā paḌegā

na bhaḌkāo nafrat kī ye aag har-sū

nahīñ to tumheñ is meñ jalnā paḌegā

are phuul kī sej par sone vaalo

kisī roz kāñToñ pe chalnā paḌegā

taraqqī kī ye shart-e-avval hai 'tal.at'

tumheñ vaqt ke saath chalnā paḌegā

tumhein shauq-e-manzil mein chalna paDega

gire ho to gir kar sanbhalna paDega

jahan mein wafa ka chalan aam kar ke

nizam-e-jafa ko badalna paDega

guhar-ha-e-maqsud gar chahte ho

hawadis ke tufan mein palna paDega

bachani hai tufan se gar apni kashti

hawaon ke ruKH ko badalna paDega

nahin mai-kade mein koi nazm baqi

hamein apna saqi badalna paDega

na gar KHwab-e-ghaflat se chaunke to tum ko

nadamat se hathon ko malna paDega

jahaalat tassub wa firqa-parasti

ye daldal hai is se nikalna paDega

the hum raunaq-e-bazm ye kya KHabar thi

kabhi shama ban kar pighalna paDega

jinhon ne sajai thi ye teri mahfil

ghazab hai unhi ko nikalna paDega

na bhaDkao nafrat ki ye aag har-su

nahin to tumhein is mein jalna paDega

are phul ki sej par sone walo

kisi roz kanTon pe chalna paDega

taraqqi ki ye shart-e-awwal hai 'talat'

tumhein waqt ke sath chalna paDega