tu jo kahta hai shab-e-wasl mein har bar nahin

tū jo kahtā hai shab-e-vasl meñ har baar nahīñ

ham samajhte haiñ ye iqrār hai inkār nahīñ

kis ke dil meñ tirī ulfat kā chubhā ḳhaar nahīñ

kaun hai vo jo tirā tālib-e-dīdār nahīñ

kufr-o-dīñ kuchh sabab-e-sub.ha-o-zunnār nahīñ

is se hotā koī kāfir koī dīñ-dār nahīñ

apnā vo haal hai jo qābil-e-iz.hār nahīñ

vo zabāñ apnī hai jo lā.eq-e-guftār nahīñ

kyā hai vo ishq ki jis kī na ho shohrat sab meñ

kyā vo āshiq hai jo rusvā sar-e-bāzār nahīñ

ishq meñ ik but-e-kāfir ke hamāre tan par

kaun sī rag hai jo ham-sūrat-e-zunnār nahīñ

mashġhala dast-e-junūñ ke liye ab kyā hogā

ek bhī apne garebāñ meñ rahā taar nahīñ

bolo āhista shab-e-vasl ḳhudā ko maano

koī bad-ḳhvāh khaḌā ho pas-e-dīvār nahīñ

aisī hālat meñ ho kyūñkar mujhe ummīd-e-visāl

mere kahne meñ vo ma.ashūq-e-tarahdār nahīñ

ab bulānā hai hameñ us kā abas ai qāsid

taab uThne kī nahīñ tāqat-e-raftār nahīñ

ziist kī baat to hai aur magar zāhir meñ

maraz-e-ishq se bachne ke kuchh āsār nahīñ

hāl-e-dil apnā bayāñ kis se karūñ ai 'sābir'

koī monis nahīñ hamdam nahīñ ġham-ḳhvār nahīñ

tu jo kahta hai shab-e-wasl mein har bar nahin

hum samajhte hain ye iqrar hai inkar nahin

kis ke dil mein teri ulfat ka chubha KHar nahin

kaun hai wo jo tera talib-e-didar nahin

kufr-o-din kuchh sabab-e-subha-o-zunnar nahin

is se hota koi kafir koi din-dar nahin

apna wo haal hai jo qabil-e-izhaar nahin

wo zaban apni hai jo laeq-e-guftar nahin

kya hai wo ishq ki jis ki na ho shohrat sab mein

kya wo aashiq hai jo ruswa sar-e-bazar nahin

ishq mein ek but-e-kafir ke hamare tan par

kaun si rag hai jo ham-surat-e-zunnar nahin

mashghala dast-e-junun ke liye ab kya hoga

ek bhi apne gareban mein raha tar nahin

bolo aahista shab-e-wasl KHuda ko mano

koi bad-KHwah khaDa ho pas-e-diwar nahin

aisi haalat mein ho kyunkar mujhe ummid-e-visal

mere kahne mein wo mashuq-e-tarahdar nahin

ab bulana hai hamein us ka abas ai qasid

tab uThne ki nahin taqat-e-raftar nahin

zist ki baat to hai aur magar zahir mein

maraz-e-ishq se bachne ke kuchh aasar nahin

haal-e-dil apna bayan kis se karun ai 'sabir'

koi monis nahin hamdam nahin gham-KHwar nahin