tu rahe ye rut rahe ye daur-e-paimana rahe

tū rahe ye rut rahe ye daur-e-paimāna rahe

tā-qayāmat sāqiyā ābād mai-ḳhāna rahe

ik taraf jaltā rahā parvāna sham-e-bazm par

ik taraf ham sham.a-ruḳh par ban ke parvāna rahe

shor bulbul kā chaman meñ hai to kyā ai ham-navā

ham to dīvāne uḌāte ḳhāk-e-vīrāna rahe

kyā zarā sī baat kā tū ne batañgaḌ kar diyā

tujh se mere yaar kis kā kab ko yārāna rahe

ham se dīvāne meñ shikve kī kahāñ tāqat bhalā

tohmateñ ham par lagā kar aap farzāna rahe

merī ulfat meñ nahīñ kuchh farq terī baat se

mere lab par tere ġhamze kā hī shukrāna rahe

kījiye 'dīvān' raushan is tarah se naam ko

hashr tak to kam se kam ulfat kā afsāna rahe

tu rahe ye rut rahe ye daur-e-paimana rahe

ta-qayamat saqiya aabaad mai-KHana rahe

ek taraf jalta raha parwana sham-e-bazm par

ek taraf hum shama-ruKH par ban ke parwana rahe

shor bulbul ka chaman mein hai to kya ai ham-nawa

hum to diwane uDate KHak-e-virana rahe

kya zara si baat ka tu ne batangaD kar diya

tujh se mere yar kis ka kab ko yarana rahe

hum se diwane mein shikwe ki kahan taqat bhala

tohmaten hum par laga kar aap farzana rahe

meri ulfat mein nahin kuchh farq teri baat se

mere lab par tere ghamze ka hi shukrana rahe

kijiye 'diwan' raushan is tarah se nam ko

hashr tak to kam se kam ulfat ka afsana rahe