uf ye barfani hawa tere baghair

uf ye barfānī havā tere baġhair

kyā piyūñ o be-vafā tere baġhair

paañv meñ Daalī huī zanjīr hai

zindagī kā silsila tere baġhair

hai ġhulāmoñ ke diloñ kī be-hisī

ye havā aur ye fazā tere baġhair

dasht-e-tīra kī ḳhamosh uftād hai

zindagī kā mudda.ā tere baġhair

zindagī aur phir hamārī zindagī

hai gunāhoñ kī sazā tere baġhair

zindagī aur zindagī kī dhuup chhāñv

tā-ba-ke aur tā-kujā tere baġhair

dīda-e-be-nūr hai mere liye

ārzūoñ kī baqā tere baġhair

zāhidoñ ke dil kī hai be-mā.egī

mahfil-e-arz-o-samā tere baġhair

kyoñ sañbhālā le liyā bīmār ne

haa.e ye kyā ho gayā tere baġhair

ye ta.ajjub hai ki zinda hai abhī

'bismil'-e-dard-āshnā tere baġhair

uf ye barfani hawa tere baghair

kya piyun o be-wafa tere baghair

panw mein Dali hui zanjir hai

zindagi ka silsila tere baghair

hai ghulamon ke dilon ki be-hisi

ye hawa aur ye faza tere baghair

dasht-e-tira ki KHamosh uftad hai

zindagi ka muddaa tere baghair

zindagi aur phir hamari zindagi

hai gunahon ki saza tere baghair

zindagi aur zindagi ki dhup chhanw

ta-ba-ke aur ta-kuja tere baghair

dida-e-be-nur hai mere liye

aarzuon ki baqa tere baghair

zahidon ke dil ki hai be-maegi

mahfil-e-arz-o-sama tere baghair

kyon sanbhaala le liya bimar ne

hae ye kya ho gaya tere baghair

ye tajjub hai ki zinda hai abhi

'bismil'-e-dard-ashna tere baghair