uljhe na ishq se kaho dair-o-haram se kya gharaz

uljhe na ishq se kaho dair-o-haram se kyā ġharaz

pīr-e-muġhāñ se kaam kyā naqsh-e-qadam se kyā ġharaz

apne sharīk bhī nahīñ ġhairoñ ko ham se kyā ġharaz

sach hai kisī ko soz-e-dil dīda-e-nam se kyā ġharaz

sun lo marīz-e-ishq kā ab to ilaaj ho chukā

ḳhud hī masīhā jab kahe aise ko dam se kyā ġharaz

pesha ho jis kā kīna-o-jaur-o-jafā to hai bajā

jalva-fagan ho kis liye mehr-o-karam se kyā ġharaz

sadqe hazār baar hue kahne pe jis ke mar-miTe

phir bhī na vo mire hue kahte haiñ ham se kyā ġharaz

mahfil-e-dilrubā meñ kyoñ charchā mirā koī kare

mere raqīb ko mire ranj-o-alam se kyā ġharaz

jām-e-sharāb kaun de rindoñ ko apnī hai paḌī

ḳhum se lage haiñ shaiḳh jī saaqī ko ham se kyā ġharaz

koī bulāne aa.e kyoñ ghar se hameñ le jaa.e kyoñ

pīr-e-muġhāñ to ham nahīñ rindoñ ko ham se kyā ġharaz

zāhid-e-sāda-lauh kyoñ taqve pe tujh ko naaz yuuñ

tere ḳhudā ko nā-samajh tauf-e-haram se kyā ġharaz

uljhe na ishq se kaho dair-o-haram se kya gharaz

pir-e-mughan se kaam kya naqsh-e-qadam se kya gharaz

apne sharik bhi nahin ghairon ko hum se kya gharaz

sach hai kisi ko soz-e-dil dida-e-nam se kya gharaz

sun lo mariz-e-ishq ka ab to ilaj ho chuka

KHud hi masiha jab kahe aise ko dam se kya gharaz

pesha ho jis ka kina-o-jaur-o-jafa to hai baja

jalwa-fagan ho kis liye mehr-o-karam se kya gharaz

sadqe hazar bar hue kahne pe jis ke mar-miTe

phir bhi na wo mere hue kahte hain hum se kya gharaz

mahfil-e-dilruba mein kyon charcha mera koi kare

mere raqib ko mere ranj-o-alam se kya gharaz

jam-e-sharab kaun de rindon ko apni hai paDi

KHum se lage hain shaiKH ji saqi ko hum se kya gharaz

koi bulane aae kyon ghar se hamein le jae kyon

pir-e-mughan to hum nahin rindon ko hum se kya gharaz

zahid-e-sada-lauh kyon taqwe pe tujh ko naz yun

tere KHuda ko na-samajh tauf-e-haram se kya gharaz