unki mahfil mein chali hai mere afkar ki baat

un kī mahfil meñ chalī hai mire afkār kī baat

fikr ne merī sujhā.ī hai mujhe daar kī baat

zardī-e-āriz-e-dil aaj bhī baaqī hai mirī

umr-bhar kartā rahā āriz-e-gulnār kī baat

fāsle ḳhatm hue jaada banā kū-e-adam

kis ko samjhā.ūñ tirī shoḳhī-e-raftār kī baat

aadmī nazm-e-ḳhudā.ī se ulajh baiThā hai

ab yahāñ sajde kī hotī hai na zunnār kī baat

apnī āvāz se bhī shaah laraz uThte haiñ

jab mahallāt meñ ho kūcha-o-bāzār kī baat

saarī duniyā dar-e-maqtal pe simaT aa.ī hai

āmad-e-sail hai kyā ho dar-o-dīvār kī baat

ik tasalsul ke sivā khel meñ kyā rakkhā hai

be-ḳhabar karte haiñ kyoñ jiit kī aur haar kī baat

kar rahā huuñ maiñ rag-e-zīst se phir ḳhuun kashīd

aa.egī un ke laboñ par abhī īsār kī baat

jaane kyoñ fikr mirī shoa.la-fishāñ hotī hai

jab bhī kartā hai koī khusravī darbār kī baat

tum agar chāho to maiñ naag se Dasvā lūñgā

sāmne mere na karnā kisī zardār kī baat

yaad aa.e mujhe vietnam se uThte sho.ale

jab bhī chheḌī hai ġham-e-dil ne qad-e-yār kī baat

mohtasib naġhma-e-pāzeb kā pāband huā

shahr ke lab pe hai zanjīr kī jhankār kī baat

na masarrat kā tasavvur hai na ġham kī taḳh.īl

zindagī apnī hai jaise koī begār kī baat

un ki mahfil mein chali hai mere afkar ki baat

fikr ne meri sujhai hai mujhe dar ki baat

zardi-e-ariz-e-dil aaj bhi baqi hai meri

umr-bhar karta raha aariz-e-gulnar ki baat

fasle KHatm hue jada bana ku-e-adam

kis ko samjhaun teri shoKHi-e-raftar ki baat

aadmi nazm-e-KHudai se ulajh baiTha hai

ab yahan sajde ki hoti hai na zunnar ki baat

apni aawaz se bhi shah laraz uThte hain

jab mahallat mein ho kucha-o-bazar ki baat

sari duniya dar-e-maqtal pe simaT aai hai

aamad-e-sail hai kya ho dar-o-diwar ki baat

ek tasalsul ke siwa khel mein kya rakkha hai

be-KHabar karte hain kyon jit ki aur haar ki baat

kar raha hun main rag-e-zist se phir KHun kashid

aaegi un ke labon par abhi isar ki baat

jaane kyon fikr meri shoala-fishan hoti hai

jab bhi karta hai koi khusrawi darbar ki baat

tum agar chaho to main nag se Daswa lunga

samne mere na karna kisi zardar ki baat

yaad aae mujhe wietnam se uThte shoale

jab bhi chheDi hai gham-e-dil ne qad-e-yar ki baat

mohtasib naghma-e-pazeb ka paband hua

shahr ke lab pe hai zanjir ki jhankar ki baat

na masarrat ka tasawwur hai na gham ki taKHil

zindagi apni hai jaise koi begar ki baat