unhen talash karo tark-e-rang-o-bu karke

unheñ talāsh karo tark-e-rang-o-bū karke

ki maiñ ne dekh liyā dil lahū lahū karke

ġharaz ki phail gayā aur dāġh-e-nākāmī

ḳhajil bahut huā maiñ ishq meñ ġhulū karke

dimāġh aur mo.attar kiyā hai saaqī ne

asīr-e-zulf-e-muambar ko hū-ba-hū karke

mirī vajah se baḌhā aur rang-e-ḳhanjar-e-nāz

kahāñ se sajda kiyā ḳhuun se vuzū karke

mirā hī naqsh-e-tamannā dikhā rahā hai mujhe

vafā kā aa.ina mere hī rū-ba-rū karke

vo muskurā to paḌā ḳhair iltijā sun kar

burā karam kiyā mahfil meñ aabrū karke

tamām raat huā kusht-o-ḳhūñ tamanna kā

nikālā phir hameñ mahfil se surḳh-rū karke

tirī talāsh meñ kis raah meñ bhaTaktā huuñ

ḳhabar nahīñ maiñ kahāñ khoyā justujū karke

na samjhe dām-e-talab ham ne jab bichhāyā thā

chaman ke phūloñ ko ham sūrat-e-subū karke

pahuñchne paa.ī na vus.at chaman kī sahrā tak

vo ik hamīñ haiñ jo pahuñche haiñ kū-ba-kū karke

chaleñge bazm meñ ham aaj un ko chauñkāne

jigar ko thaam ke dāmān-e-dil rafū karke

kisī ne sach kahā 'dīvān' jhuuT vo samjhe

kahīñ ke ham na rahe un se guftugū karke

unhen talash karo tark-e-rang-o-bu karke

ki main ne dekh liya dil lahu lahu karke

gharaz ki phail gaya aur dagh-e-nakaami

KHajil bahut hua main ishq mein ghulu karke

dimagh aur moattar kiya hai saqi ne

asir-e-zulf-e-muambar ko hu-ba-hu karke

meri wajah se baDha aur rang-e-KHanjar-e-naz

kahan se sajda kiya KHun se wuzu karke

mera hi naqsh-e-tamanna dikha raha hai mujhe

wafa ka aaina mere hi ru-ba-ru karke

wo muskura to paDa KHair iltija sun kar

bura karam kiya mahfil mein aabru karke

tamam raat hua kusht-o-KHun tamanna ka

nikala phir hamein mahfil se surKH-ru karke

teri talash mein kis rah mein bhaTakta hun

KHabar nahin main kahan khoya justuju karke

na samjhe dam-e-talab hum ne jab bichhaya tha

chaman ke phulon ko hum surat-e-subu karke

pahunchne pai na wusat chaman ki sahra tak

wo ek hamin hain jo pahunche hain ku-ba-ku karke

chalenge bazm mein hum aaj un ko chaunkane

jigar ko tham ke daman-e-dil rafu karke

kisi ne sach kaha 'diwan' jhuT wo samjhe

kahin ke hum na rahe un se guftugu karke