uski qurbat ka tamasha bhi ajab hai sain

us kī qurbat kā tamāshā bhī ajab hai sā.īñ

log bīmār samajhte haiñ ġhazab hai sā.īñ

ab tabī.at ke na lagne pe khulā mahfil meñ

ik vahī shoḳh nahīñ vaise to sab hai sā.īñ

haa.e kambaḳht ne is darja kiyā hai māyūs

maiñ samajhtā thā ki iz.hār-ba-lab hai sā.īñ

maiñ bhī kuchh apne hunar kā to dikhā.ūñ jalva

jashn-e-nauroz batā shahr meñ kab hai sā.īñ

rañg khultā hai kahāñ shaam se pahle us kā

shaam bhī der se aatī hai ġhazab hai sā.īñ

shauq merā ye nahīñ hai mirī majbūrī hai

kuchh to is tarah bhaTakne kā sabab hai sā.īñ

dard-e-dil le ke kahīñ aur bhalā kyoñ jā.ūñ

sāmne jab mire terā ye matab hai sā.īñ

us ki qurbat ka tamasha bhi ajab hai sain

log bimar samajhte hain ghazab hai sain

ab tabiat ke na lagne pe khula mahfil mein

ek wahi shoKH nahin waise to sab hai sain

hae kambaKHt ne is darja kiya hai mayus

main samajhta tha ki izhaar-ba-lab hai sain

main bhi kuchh apne hunar ka to dikhaun jalwa

jashn-e-nauroz bata shahr mein kab hai sain

rang khulta hai kahan sham se pahle us ka

sham bhi der se aati hai ghazab hai sain

shauq mera ye nahin hai meri majburi hai

kuchh to is tarah bhaTakne ka sabab hai sain

dard-e-dil le ke kahin aur bhala kyon jaun

samne jab mere tera ye matab hai sain