us pe har naqsh ubharta hai guzarne wala

us pe har naqsh ubhartā hai guzarne vaalā

sat.h-e-dariyā pe nahīñ koī Thaharne vaalā

apnī pūñjī ko kiyā maiñ ne havāle us ke

thā jo raste meñ mirī jeb katarne vaalā

jis taraf dekhiye chhā.e haiñ ġhamoñ ke bādal

jaane kis zaḳhm kā chehra hai bikharne vaalā

merī āñkhoñ kī pahuñch dekh ke Dar jaatā hai

rang be-nūr tasāvīr meñ bharne vaalā

vo chunā kartā hai har raat chamakte taare

maiñ bunā kartā huuñ har ḳhvāb bikharne vaalā

dil ke zaḳhmoñ ko zabāñ dete ho kyoñ phūloñ kī

itnī gahrā.ī meñ hai kaun utarne vaalā

tābish-e-mehr se mujh ko na Darānā 'vasfī'

maiñ to huuñ apnī hī bīnā.ī se Darne vaalā

us pe har naqsh ubharta hai guzarne wala

sath-e-dariya pe nahin koi Thaharne wala

apni punji ko kiya main ne hawale us ke

tha jo raste mein meri jeb katarne wala

jis taraf dekhiye chhae hain ghamon ke baadal

jaane kis zaKHm ka chehra hai bikharne wala

meri aankhon ki pahunch dekh ke Dar jata hai

rang be-nur tasawir mein bharne wala

wo chuna karta hai har raat chamakte tare

main buna karta hun har KHwab bikharne wala

dil ke zaKHmon ko zaban dete ho kyon phulon ki

itni gahrai mein hai kaun utarne wala

tabish-e-mehr se mujh ko na Darana 'wasfi'

main to hun apni hi binai se Darne wala