wajh-e-KHalish hai ba’is-e-asudgi bhi hai

vaj.h-e-ḳhalish hai bā’is-e-āsūdgī bhī hai

ye bo'd jis meñ lazzat-e-hamsā.egī bhī hai

kuchh dasht ke bagūle bhī haiñ bā'is-e-fishār

kuchh ḳhud mizāj-e-ḳhāk meñ āvārgī bhī hai

bastī koī 'ajīb hai ye is jagah ke log

ḳhanda-ba-lab haiñ chehroñ pe āzurdagī bhī hai

vaise bhī kuchh yahāñ se tabī'at hai ab uchāT

yuuñ dil ko is dayār se vābastagī bhī hai

is apnī gosha-gīrī ke haiñ aur bhī sabab

ik vaj.h past-himmatoñ kī ḳhvājgī bhī hai

vo ātishīñ kurah hai ye dil jis ke har taraf

tārīkī-e-ḳhalā bhī hai yaḳh-bastagī bhī hai

phir mujh se qaum kartī hai kyoñ mo'jize talab

jab tā’n-e-sehr-o-tohmat-e-dīvāngī bhī hai

maujūdgī tirī muta’ayyan na ho sakī

ai tū ki har jagah tirī maujūdgī bhī hai

kyā kījiye 'bashīr' shu'ūr-e-anā ke saath

hukm-e-sujūd-o-'ājizī-o-bandagī bhī hai

wajh-e-KHalish hai ba’is-e-asudgi bhi hai

ye bo'd jis mein lazzat-e-hamsaegi bhi hai

kuchh dasht ke bagule bhi hain ba'is-e-fishaar

kuchh KHud mizaj-e-KHak mein aawargi bhi hai

basti koi 'ajib hai ye is jagah ke log

KHanda-ba-lab hain chehron pe aazurdagi bhi hai

waise bhi kuchh yahan se tabi'at hai ab uchaT

yun dil ko is dayar se wabastagi bhi hai

is apni gosha-giri ke hain aur bhi sabab

ek wajh past-himmaton ki KHwajgi bhi hai

wo aatishin kurah hai ye dil jis ke har taraf

tariki-e-KHala bhi hai yaKH-bastagi bhi hai

phir mujh se qaum karti hai kyon mo'jize talab

jab ta’n-e-sehr-o-tohmat-e-diwangi bhi hai

maujudgi teri muta’ayyan na ho saki

ai tu ki har jagah teri maujudgi bhi hai

kya kijiye 'bashir' shu'ur-e-ana ke sath

hukm-e-sujud-o-'ajizi-o-bandagi bhi hai