wo har tufan jo ham-aghosh-e-sahil hota jata hai

vo har tūfāñ jo ham-āġhosh-e-sāhil hotā jaatā hai

husūl-e-gauhar-e-tābāñ meñ haa.il hotā jaatā hai

mirā zauq-e-tajassus kāmgār o kāmrāñ hogā

darāz ab kis liye dāmān-e-sāhil hotā jaatā hai

jo uqda koshish-e-paiham se āsāñ kartā jaatā huuñ

vo uqda aur mushkil aur mushkil hotā jaatā hai

na jaane kis tarah kis vāste kis dil se piitā huuñ

zamāna hai ki sarf-e-vahm-e-bātil hotā jaatā hai

ḳhudā jaane mujhe vo dekhte haiñ kin adāoñ se

ki ġham āhista āhista mirā dil hotā jaatā hai

tire hoñToñ se saaqī jis qadar maiñ piitā jaatā huuñ

javānī kā mujhe ehsās-e-kāmil hotā jaatā hai

kahāñ tak shikva-e-be-mehrī-e-ahbāb ai hamdam

zamāna darpa.e-āzār-e-'bismil' hotā jaatā hai

wo har tufan jo ham-aghosh-e-sahil hota jata hai

husul-e-gauhar-e-taban mein hail hota jata hai

mera zauq-e-tajassus kaamgar o kaamran hoga

daraaz ab kis liye daman-e-sahil hota jata hai

jo uqda koshish-e-paiham se aasan karta jata hun

wo uqda aur mushkil aur mushkil hota jata hai

na jaane kis tarah kis waste kis dil se pita hun

zamana hai ki sarf-e-wahm-e-baatil hota jata hai

KHuda jaane mujhe wo dekhte hain kin adaon se

ki gham aahista aahista mera dil hota jata hai

tere honTon se saqi jis qadar main pita jata hun

jawani ka mujhe ehsas-e-kaamil hota jata hai

kahan tak shikwa-e-be-mehri-e-ahbab ai hamdam

zamana darpae-azar-e-'bismil' hota jata hai