wo kar raha hai wafaen magar jafa ki tarah

vo kar rahā hai vafā.eñ magar jafā kī tarah

ye ziist kaT to rahī hai magar sazā kī tarah

marīz-e-hijr-e-mohabbat samajh na paa.e ise

pilāo zahr pilāo magar davā kī tarah

darāz mere gunāhoñ kā silsila hai magar

tire karam ke muqābil huuñ be-ḳhatā kī tarah

sunī na paañv kī aahaT mirī samā.at ne

vo aa.e aa ke chale bhī ga.e havā kī tarah

har ek shaḳhs ke chehre pe ek chehra hai

ki aaj lagtā hai rahzan bhī rahnumā kī tarah

ye mere dil kī tamanna hai āḳhirī 'māhir'

tū mere saath rahe har qadam duā kī tarah

wo kar raha hai wafaen magar jafa ki tarah

ye zist kaT to rahi hai magar saza ki tarah

mariz-e-hijr-e-mohabbat samajh na pae ise

pilao zahr pilao magar dawa ki tarah

daraaz mere gunahon ka silsila hai magar

tere karam ke muqabil hun be-KHata ki tarah

suni na panw ki aahaT meri samaat ne

wo aae aa ke chale bhi gae hawa ki tarah

har ek shaKHs ke chehre pe ek chehra hai

ki aaj lagta hai rahzan bhi rahnuma ki tarah

ye mere dil ki tamanna hai aaKHiri 'mahir'

tu mere sath rahe har qadam dua ki tarah