wo marka jo hai nahin sar ho nahin raha

vo ma.arka jo hai nahīñ sar ho nahīñ rahā

ik be-fasīl shahr meñ dar ho nahīñ rahā

maiñ chāhtā huuñ terī mohabbat yatīm ho

par merī badduā meñ asar ho nahīñ rahā

us be-zamīr husn pe ik aur e.atibār

ho jaanā chāhiye thā magar ho nahīñ rahā

maiñ chhoḌne ke dar pe huuñ ye kār-e-ḳhud-kushī

maulā tū apne haath se kar ho nahīñ rahā

soyā nahīñ maiñ barsoñ talak jis ke ḳhauf se

vo ḳhvāb ab bhī āñkh-badar ho nahīñ rahā

baiThā hai paañv moḌ ke sāhil-fareb zehn

dil Dūbne lagā hai safar ho nahīñ rahā

wo marka jo hai nahin sar ho nahin raha

ek be-fasil shahr mein dar ho nahin raha

main chahta hun teri mohabbat yatim ho

par meri baddua mein asar ho nahin raha

us be-zamir husn pe ek aur eatibar

ho jaana chahiye tha magar ho nahin raha

main chhoDne ke dar pe hun ye kar-e-KHud-kushi

maula tu apne hath se kar ho nahin raha

soya nahin main barson talak jis ke KHauf se

wo KHwab ab bhi aankh-badar ho nahin raha

baiTha hai panw moD ke sahil-fareb zehn

dil Dubne laga hai safar ho nahin raha