ye ahl-e-hawas har gam pe apni shan badalte rahte hain

ye ahl-e-havas har gaam pe apnī shaan badalte rahte haiñ

mausam ke mutābiq 'ishrat kā sāmān badalte rahte haiñ

insāf kī gardan par ḳhanjar chaltā hai daulat-mandoñ kā

be-dard zamāne ke tevar har aan badalte rahte haiñ

muḳhtār kahīñ majbūr kahīñ zardār kahīñ nādār kahīñ

is tarh kitāb-e-hastī ke 'unvān badalte rahte haiñ

ai duniyā vaalo jhuuT nahīñ ye duniyā hai aur duniyā meñ

chāñdī ke chamakte sikkoñ par īmān badalte rahte haiñ

jis roz se ḳhitta-e-duniyā par insān kī shāhī qaa.em hai

qānūn badaltā rahtā hai farmān badalte rahte haiñ

afsos dar-e-munsif se bhī insāf kī bhiik nahīñ miltī

kahne ke liye har roz na.e darbān badalte rahte haiñ

muusā kī zarūrat hai yā-rab fir’aunoñ kī is bastī meñ

ḳhūñḳhār darindoñ kī sūrat insān badalte rahte haiñ

aadam ke sapūtoñ kī ab tak raftār vahī hai duniyā meñ

har gaam pe lekin chaal apnī shaitān badalte rahte haiñ

ye ahl-e-hawas har gam pe apni shan badalte rahte hain

mausam ke mutabiq 'ishrat ka saman badalte rahte hain

insaf ki gardan par KHanjar chalta hai daulat-mandon ka

be-dard zamane ke tewar har aan badalte rahte hain

muKHtar kahin majbur kahin zardar kahin nadar kahin

is tarh kitab-e-hasti ke 'unwan badalte rahte hain

ai duniya walo jhuT nahin ye duniya hai aur duniya mein

chandi ke chamakte sikkon par iman badalte rahte hain

jis roz se KHitta-e-duniya par insan ki shahi qaem hai

qanun badalta rahta hai farman badalte rahte hain

afsos dar-e-munsif se bhi insaf ki bhik nahin milti

kahne ke liye har roz nae darban badalte rahte hain

musa ki zarurat hai ya-rab fir’aunon ki is basti mein

KHunKHar darindon ki surat insan badalte rahte hain

aadam ke saputon ki ab tak raftar wahi hai duniya mein

har gam pe lekin chaal apni shaitan badalte rahte hain