ye bhi shayad tera andaz-e-dil-arai hai

ye bhī shāyad tirā andāz-e-dil-ārā.ī hai

ham ne har saañs pe marne kī sazā paa.ī hai

kaisā paiġhām kahāñ se ye sabā laa.ī hai

shāḳh-e-gul sub.h-e-bahārāñ hī meñ murjhā.ī hai

dil ke ābād ḳharābe meñ na shab hai na sahar

chāñdnī le ke tirī yaad kahāñ aa.ī hai

tū mire chāk-e-garebāñ se to mahjūb na ho

maiñ ne kab terī mohabbat kī qasam khaa.ī hai

tujh ko is tarah bhī dekhā hai mirī āñkhoñ meñ

terī āvāz kī tasvīr utar aa.ī hai

terī mahfil meñ ki maqtal meñ kahīñ dekhā thā

zindagī se mirī bas itnī shanāsā.ī hai

kyā tirā haal bhī ai anjuman-ārā hai yahī

maiñ tire paas huuñ lekin vahī tanhā.ī hai

ye bhi shayad tera andaz-e-dil-arai hai

hum ne har sans pe marne ki saza pai hai

kaisa paigham kahan se ye saba lai hai

shaKH-e-gul subh-e-bahaaran hi mein murjhai hai

dil ke aabaad KHarabe mein na shab hai na sahar

chandni le ke teri yaad kahan aai hai

tu mere chaak-e-gareban se to mahjub na ho

main ne kab teri mohabbat ki qasam khai hai

tujh ko is tarah bhi dekha hai meri aankhon mein

teri aawaz ki taswir utar aai hai

teri mahfil mein ki maqtal mein kahin dekha tha

zindagi se meri bas itni shanasai hai

kya tera haal bhi ai anjuman-ara hai yahi

main tere pas hun lekin wahi tanhai hai