ye na-sipasi-e-gulchin jhalak nahin rahi hai

ye nā-sipāsī-e-gulchīñ jhalak nahīñ rahī hai

sabā ke bhes meñ sarsar thirak nahīñ rahī hai

fazā meñ raqsāñ hai nā-āshnā-e-mahz havā

jabhī to shāḳh-e-mohabbat lachak nahīñ rahī hai

hazār ġhaltāñ-o-pechāñ hoñ ab parindoñ meñ

vo tinke joḌne vaalī lalak nahīñ rahī hai

hai saaf saaf ye aurāq-e-gul pe likkhā huā

ghaḌī ḳhizāñ kī zarā bhī sarak nahīñ rahī hai

ga.ī rutoñ ke havāloñ se gul khilātā hai

use ḳhud apnī zalālat khaTak nahīñ rahī hai

fishār-e-gard se manzar tamām aTā huā hai

chaman-parast nazar phir bhī thak nahīñ rahī hai

mirā bhī dhuup meñ ab sar Tanakne lagtā hai

kamar pe us ke bhī choTī laTak nahīñ rahī hai

ulajh ke rah ga.ī tār-e-nafas meñ hasrat-e-dil

bharī hai aañkh palak tak jhapak nahīñ rahī hai

halāl kar gayā har aarzū vo jaate hue

ġham-e-firāq meñ lazzat talak nahīñ rahī hai

ḳhudā kare ki vo ḳhush-hāl-o-'sarfarāz' rahe

kasak ba-nām bhī dil meñ kasak nahīñ rahī hai

ye na-sipasi-e-gulchin jhalak nahin rahi hai

saba ke bhes mein sarsar thirak nahin rahi hai

faza mein raqsan hai na-ashna-e-mahz hawa

jabhi to shaKH-e-mohabbat lachak nahin rahi hai

hazar ghaltan-o-pechan hon ab parindon mein

wo tinke joDne wali lalak nahin rahi hai

hai saf saf ye auraq-e-gul pe likkha hua

ghaDi KHizan ki zara bhi sarak nahin rahi hai

gai ruton ke hawalon se gul khilata hai

use KHud apni zalalat khaTak nahin rahi hai

fishaar-e-gard se manzar tamam aTa hua hai

chaman-parast nazar phir bhi thak nahin rahi hai

mera bhi dhup mein ab sar Tanakne lagta hai

kamar pe us ke bhi choTi laTak nahin rahi hai

ulajh ke rah gai tar-e-nafas mein hasrat-e-dil

bhari hai aankh palak tak jhapak nahin rahi hai

halal kar gaya har aarzu wo jate hue

gham-e-firaq mein lazzat talak nahin rahi hai

KHuda kare ki wo KHush-haal-o-'sarfaraaz' rahe

kasak ba-nam bhi dil mein kasak nahin rahi hai