yun sang-dil hayat se ahd-o-wafa kiya

yuuñ sañg-dil hayāt se ahd-o-vafā kiyā

dīvār darmiyāñ thī magar ḳhud ko vā kiyā

miTTī kā rañg-o-nūr se rishta qadīm thā

har baar zindagī ne nayā tajraba kiyā

the dastaras meñ yuuñ to sab asrār-e-kā.enāt

is umr-e-bevafā ne magar nā-rasā kiyā

har ajnabī maqām se tanhā guzar ga.e

apnā hī naqsh-e-pā thā jise rahnumā kiyā

chamkā diyā lahū ne dil-e-tīra-jism ko

ik sail-e-nūr thā ki ragoñ meñ bahā kiyā

dānista luT gayā ye saman-zār dekhnā

phūloñ ne nik.hatoñ ko sipurd-e-sabā kiyā

ye raat raushnī kī tamannā meñ bujh ga.ī

dil ko ye kis shikast ne be-mudda.ā kiyā

yuuñ to jahāñ tamām hai tūfān-e-rañg-o-nūr

kis ābshār ne hameñ rañgīñ-navā kiyā

yun sang-dil hayat se ahd-o-wafa kiya

diwar darmiyan thi magar KHud ko wa kiya

miTTi ka rang-o-nur se rishta qadim tha

har bar zindagi ne naya tajraba kiya

the dastaras mein yun to sab asrar-e-kaenat

is umr-e-bewafa ne magar na-rasa kiya

har ajnabi maqam se tanha guzar gae

apna hi naqsh-e-pa tha jise rahnuma kiya

chamka diya lahu ne dil-e-tira-jism ko

ek sail-e-nur tha ki ragon mein baha kiya

danista luT gaya ye saman-zar dekhna

phulon ne nikhaton ko sipurd-e-saba kiya

ye raat raushni ki tamanna mein bujh gai

dil ko ye kis shikast ne be-muddaa kiya

yun to jahan tamam hai tufan-e-rang-o-nur

kis aabshaar ne hamein rangin-nawa kiya