zabt-e-fughan se aa gai honTon pe jaan talak

zabt-e-fuġhāñ se aa ga.ī hoñToñ pe jaañ talak

dekhoge mere sabr kī tāqat kahāñ talak

ġhaflat-shi.ār haa.e taġhāful kahāñ talak

jiitā rahegā kaun tire imtihāñ talak

vā'iz kā rabt-zabt chhupā.ūñ kahāñ talak

tauba kī baat pahuñchī hai pīr-e-muġhāñ talak

vo merī aarzū thī jo ghuT ghuT ke rah ga.ī

vo dil kī baat thī jo na aa.ī zabāñ talak

josh-e-junūñ se dāman-e-gardūñ bhī chaak hai

pahoñche zamīn ke haath magar āsmāñ talak

DhūñDoge phir bhī mashq-e-sitam ke liye mujhe

dushman jafā sahegā tumhārī kahāñ talak

gulshan meñ aage tum to 'ajab haal kar ga.e

bhūle hue haiñ murġh-e-chaman āshiyāñ talak

pāmāl kar ke ḳhaak uḌāne se fā.eda

aise chalo ki merā miTā do nishāñ talak

yaad aa.e chhuT ke daam se sayyād ke karam

pahuñchā do koī mujh ko mire mehrbāñ talak

kahtā hai kaun marg ijāzat-talab nahīñ

yaañ dam rukā huā hai faqat terī haañ talak

dil garmī-e-raqīb se jal-bhun ke rah gayā

aur merā zabt dekh na uTThā dhuāñ talak

'sho.ala' ke baa'd ḳhatm hai ījād-e-tarz-e-nau

kuchh lutf thā suḳhan kā usī ḳhush-bayāñ talak

zabt-e-fughan se aa gai honTon pe jaan talak

dekhoge mere sabr ki taqat kahan talak

ghaflat-shiar hae taghaful kahan talak

jita rahega kaun tere imtihan talak

wa'iz ka rabt-zabt chhupaun kahan talak

tauba ki baat pahunchi hai pir-e-mughan talak

wo meri aarzu thi jo ghuT ghuT ke rah gai

wo dil ki baat thi jo na aai zaban talak

josh-e-junun se daman-e-gardun bhi chaak hai

pahonche zamin ke hath magar aasman talak

DhunDoge phir bhi mashq-e-sitam ke liye mujhe

dushman jafa sahega tumhaari kahan talak

gulshan mein aage tum to 'ajab haal kar gae

bhule hue hain murgh-e-chaman aashiyan talak

pamal kar ke KHak uDane se faeda

aise chalo ki mera miTa do nishan talak

yaad aae chhuT ke dam se sayyaad ke karam

pahuncha do koi mujh ko mere mehrban talak

kahta hai kaun marg ijazat-talab nahin

yan dam ruka hua hai faqat teri han talak

dil garmi-e-raqib se jal-bhun ke rah gaya

aur mera zabt dekh na uTTha dhuan talak

'shoala' ke ba'd KHatm hai ijad-e-tarz-e-nau

kuchh lutf tha suKHan ka usi KHush-bayan talak