zahe wahshat ki huzn-e-duri-e-manzil pasand aaya

zahe vahshat kī huzn-e-dūrī-e-manzil pasand aaya

dil-e-īzā-talab ko uqda-e-mushkil pasand aaya

mire husn-e-nazar kī sharh hotī hai zamāne meñ

ki har ahl-e-tabī.at ko mirā qātil pasand aaya

guhar-yābī kī ik tamhīd ho kar rah gayā tūfāñ

mujhe jab se firāq-e-ishrat-e-sāhil pasand aaya

ba-hangām-e-tajassus zindagī se pyaar kyā ma.anī

vo insāñ kyā jise naqsh-e-sar-e-manzil pasand aaya

chale aa.e harīm-e-nāz se vo kho.e kho.e se

jazāk-allāh unheñ iḳhfā-e-hāl-e-dil pasand aaya

hijāb aaya to har jānib fazā badlī huī dekhī

naqāb ulTī to rang-e-shorish-e-mahfil pasand aaya

kabhī ā.īn-e-ġham-ḳhvārī-e-dil marġhūb hai ham ko

kabhī tarz-e-sitam-ījādī-e-qātil pasand aaya

ḳhudā lagtī kaho lillāh sadāqat ko na jhuTlāo

tumheñ afsāna-e-betābi-e-'bismil' pasand aaya

zahe wahshat ki huzn-e-duri-e-manzil pasand aaya

dil-e-iza-talab ko uqda-e-mushkil pasand aaya

mere husn-e-nazar ki sharh hoti hai zamane mein

ki har ahl-e-tabiat ko mera qatil pasand aaya

guhar-yabi ki ek tamhid ho kar rah gaya tufan

mujhe jab se firaq-e-ishrat-e-sahil pasand aaya

ba-hangam-e-tajassus zindagi se pyar kya mani

wo insan kya jise naqsh-e-sar-e-manzil pasand aaya

chale aae harim-e-naz se wo khoe khoe se

jazak-allah unhen iKHfa-e-haal-e-dil pasand aaya

hijab aaya to har jaanib faza badli hui dekhi

naqab ulTi to rang-e-shorish-e-mahfil pasand aaya

kabhi aain-e-gham-KHwari-e-dil marghub hai hum ko

kabhi tarz-e-sitam-ijadi-e-qatil pasand aaya

KHuda lagti kaho lillah sadaqat ko na jhuTlao

tumhein afsana-e-betabi-e-'bismil' pasand aaya