zauq-e-nazar hudud baDhane mein rah gaya

zauq-e-nazar hudūd baḌhāne meñ rah gayā

nādān dil havas ke miTāne meñ rah gayā

kaise baseñgī ahl-e-vafā dil kī bastiyāñ

tū to jahāñ kā dard uThāne meñ rah gayā

shoḳhī-e-iltifāt bhī hogī isī se kal

rabt-e-nihāñ jo aaj baḌhāne meñ rah gayā

shāyad azal se ishq kī qismat meñ thā jabhī

duniyā ke sard-o-garm uThāne meñ rah gayā

ehsās-e-ishq se vahī mahrūm ho gayā

dil se kisī kī yaad bhulāne meñ rah gayā

kaif-e-fanā se kuchh hai vahī rāz-āshnā

vo jo charāġh dil kā bujhāne meñ rah gayā

jān-e-nashāt aur ḳhizāñ-dīda bhī vahī

jo shoḳhī-e-bahār uḌāne meñ rah gayā

vo fitna-hā-e-hashr mirā muntazir kahāñ

maiñ to kisī ke naaz uThāne meñ rah gayā

samjhā na zarf-e-dil ko na dekhā hī tuur ko

bas apnī dhun se barq girāne meñ rah gayā

vo bad-gumān-e-ishq rahā bazm-e-nāz meñ

dar-parda kuchh fareb sā khāne meñ rah gayā

'dīvān' mehr-o-māh kisī kī hai gard-e-rāh

koī galī kī ḳhaak uḌāne meñ rah gayā

zauq-e-nazar hudud baDhane mein rah gaya

nadan dil hawas ke miTane mein rah gaya

kaise basengi ahl-e-wafa dil ki bastiyan

tu to jahan ka dard uThane mein rah gaya

shoKHi-e-iltifat bhi hogi isi se kal

rabt-e-nihan jo aaj baDhane mein rah gaya

shayad azal se ishq ki qismat mein tha jabhi

duniya ke sard-o-garm uThane mein rah gaya

ehsas-e-ishq se wahi mahrum ho gaya

dil se kisi ki yaad bhulane mein rah gaya

kaif-e-fana se kuchh hai wahi raaz-ashna

wo jo charagh dil ka bujhane mein rah gaya

jaan-e-nashat aur KHizan-dida bhi wahi

jo shoKHi-e-bahaar uDane mein rah gaya

wo fitna-ha-e-hashr mera muntazir kahan

main to kisi ke naz uThane mein rah gaya

samjha na zarf-e-dil ko na dekha hi tur ko

bas apni dhun se barq girane mein rah gaya

wo bad-guman-e-ishq raha bazm-e-naz mein

dar-parda kuchh fareb sa khane mein rah gaya

'diwan' mehr-o-mah kisi ki hai gard-e-rah

koi gali ki KHak uDane mein rah gaya