banda-parwar din tasawwur kar rahe hain raat ko

banda-parvar din tasavvur kar rahe haiñ raat ko

yā hamīñ ulTā samajh baiThe haiñ sīdhī baat ko

dūsroñ kī raah meñ kāñTe bichhā dene ke ba.ad

aadmī taklīf pahuñchātā hai apnī zaat ko

ham ujāle ke pujārī tum añdhere ke dhanī

din meñ zarre jagmagāte haiñ sitāre raat ko

bekasoñ par tanz ke patthar to bhārī chiiz haiñ

Thes phūloñ se pahuñch jaatī hai ehsāsāt ko

ham ġharīboñ kā ta.alluq rang-mahloñ se kahāñ

khetiyoñ se vāsta kyā shahr kī barsāt ko

vo hameñ talqīn farmāte haiñ aise mashvare

jaise andhe se kahā jaa.e ki baa.eñ haath ko

apne irshādāt par ai 'shād' pachhtāte haiñ vo

reza-chīñ malte haiñ makkhan jin ke irshādāt par

banda-parwar din tasawwur kar rahe hain raat ko

ya hamin ulTa samajh baiThe hain sidhi baat ko

dusron ki rah mein kanTe bichha dene ke baad

aadmi taklif pahunchata hai apni zat ko

hum ujale ke pujari tum andhere ke dhani

din mein zarre jagmagate hain sitare raat ko

bekason par tanz ke patthar to bhaari chiz hain

Thes phulon se pahunch jati hai ehsasat ko

hum gharibon ka talluq rang-mahlon se kahan

khetiyon se wasta kya shahr ki barsat ko

wo hamein talqin farmate hain aise mashware

jaise andhe se kaha jae ki baen hath ko

apne irshadat par ai 'shad' pachhtate hain wo

reza-chin malte hain makkhan jin ke irshadat par