aalam aalam ishq-o-junun hai duniya duniya tohmat hai

aalam aalam ishq-o-junūñ hai duniyā duniyā tohmat hai

dariyā dariyā rotā huuñ maiñ sahrā sahrā vahshat hai

ham to ishq meñ nā-kas Thahre koī na īdhar dekhegā

aañkh uThā kar vo dekhe to ye bhī us kī muravvat hai

haa.e ġhayūrī jis ke dekhe jī hī nikaltā hai apnā

dekhiye us kī or nahīñ phir ishq kī ye bhī ġhairat hai

koī dam raunaq majlis kī aur bhī hai is dam ke saath

ya.anī charāġh-e-sub.h se haiñ ham dam apnā bhī ġhanīmat hai

ḳhat aa.e zāhir hai ham par bigḌī bhī achchhī sūrat thī

baare kaho nākām hī ho yā kaam kī bhī kuchh sūrat hai

ek varaq par tasvīreñ maiñ dekhī haiñ lailā-o-majnūñ kī

aisī sūrat-e-hāl kī apnī un donoñ ko hairat hai

ḳhaak se aadam kar ke uThāyā jis ko dast-e-qudrat ne

qadr nahīñ kuchh us bande kī ye bhī ḳhudā kī qudrat hai

sub.h se aañsū naumīdāna jaise vidā.ī aatā thā

aaj kisū ḳhvāhish kī shāyad dil se hamāre ruḳhsat hai

kyā dilkash hai bazm jahāñ kī jaate yaañ se jise dekho

vo ġham-dīda ranj-kashīda aah sarāpā hasrat hai

jab kuchh apne kane rakhte the tab bhī sarf thā laḌkoñ kā

ab jo faqīr hue phirte haiñ 'mīr' unhīñ kī daulat hai

aalam aalam ishq-o-junun hai duniya duniya tohmat hai

dariya dariya rota hun main sahra sahra wahshat hai

hum to ishq mein na-kas Thahre koi na idhar dekhega

aankh uTha kar wo dekhe to ye bhi us ki murawwat hai

hae ghayuri jis ke dekhe ji hi nikalta hai apna

dekhiye us ki or nahin phir ishq ki ye bhi ghairat hai

koi dam raunaq majlis ki aur bhi hai is dam ke sath

yani charagh-e-subh se hain hum dam apna bhi ghanimat hai

KHat aae zahir hai hum par bigDi bhi achchhi surat thi

bare kaho nakaam hi ho ya kaam ki bhi kuchh surat hai

ek waraq par taswiren main dekhi hain laila-o-majnun ki

aisi surat-e-haal ki apni un donon ko hairat hai

KHak se aadam kar ke uThaya jis ko dast-e-qudrat ne

qadr nahin kuchh us bande ki ye bhi KHuda ki qudrat hai

subh se aansu naumidana jaise widai aata tha

aaj kisu KHwahish ki shayad dil se hamare ruKHsat hai

kya dilkash hai bazm jahan ki jate yan se jise dekho

wo gham-dida ranj-kashida aah sarapa hasrat hai

jab kuchh apne kane rakhte the tab bhi sarf tha laDkon ka

ab jo faqir hue phirte hain 'mir' unhin ki daulat hai