kahiyo qasid jo wo puchhe hamein kya karte hain

kahiyo qāsid jo vo pūchhe hameñ kyā karte haiñ

jān-o-īmān-o-mohabbat ko duā karte haiñ

ishq ātish bhī jo deve to na dam māreñ ham

sham-e-tasvīr haiñ ḳhāmosh jalā karte haiñ

jaa.e hī na maraz-e-dil to nahīñ is kā ilaaj

apne maqdūr talak ham to davā karte haiñ

us ke kūche meñ na kar shor-e-qayāmat kā zikr

shaiḳh yaañ aise to hangāme huā karte haiñ

bebasī se to tirī bazm meñ ham bahre bane

nek-o-bad koī kahe baiThe sunā karte haiñ

ruḳhsat-e-jumbish-e-lab ishq kī hairat se nahīñ

muddateñ guzrīñ ki ham chup hī rahā karte haiñ

tū parī shīshe se nāzuk hai na kar da.avā-e-mehr

dil haiñ patthar ke unhoñ ke jo vafā karte haiñ

tujh se lag jā ke ye yuuñ jaate raheñ mujh se haif

dīda-o-dil ne na jaanā ki daġhā karte haiñ

fursat-e-ḳhvāb nahīñ zikr-e-butāñ meñ ham ko

raat din raam kahānī sī kahā karte haiñ

majlis-e-hāl meñ mauzūñ harakat shaiḳh kī dekh

hīz-e-shara.ī bhī dam-e-raqs maza karte haiñ

ye zamāna nahīñ aisā ki koī ziist kare

chāhte haiñ jo burā apnā bhalā karte haiñ

mahz nākāra bhī mat jaan hameñ tū ki kahīñ

aise nākām bhī bekār phirā karte haiñ

tujh bin is jān-e-musībat-zada ġham-dīda pe ham

kuchh nahīñ karte to afsos kiyā karte haiñ

kyā kaheñ 'mīr' jī ham tum se ma.āsh apnī ġharaz

ġham ko khāyā kareñ haiñ lohū piyā karte haiñ

kahiyo qasid jo wo puchhe hamein kya karte hain

jaan-o-iman-o-mohabbat ko dua karte hain

ishq aatish bhi jo dewe to na dam maren hum

sham-e-taswir hain KHamosh jala karte hain

jae hi na maraz-e-dil to nahin is ka ilaj

apne maqdur talak hum to dawa karte hain

us ke kuche mein na kar shor-e-qayamat ka zikr

shaiKH yan aise to hangame hua karte hain

bebasi se to teri bazm mein hum bahre bane

nek-o-bad koi kahe baiThe suna karte hain

ruKHsat-e-jumbish-e-lab ishq ki hairat se nahin

muddaten guzrin ki hum chup hi raha karte hain

tu pari shishe se nazuk hai na kar dawa-e-mehr

dil hain patthar ke unhon ke jo wafa karte hain

tujh se lag ja ke ye yun jate rahen mujh se haif

dida-o-dil ne na jaana ki dagha karte hain

fursat-e-KHwab nahin zikr-e-butan mein hum ko

raat din ram kahani si kaha karte hain

majlis-e-haal mein mauzun harakat shaiKH ki dekh

hiz-e-sharai bhi dam-e-raqs maza karte hain

ye zamana nahin aisa ki koi zist kare

chahte hain jo bura apna bhala karte hain

mahz nakara bhi mat jaan hamein tu ki kahin

aise nakaam bhi bekar phira karte hain

tujh bin is jaan-e-musibat-zada gham-dida pe hum

kuchh nahin karte to afsos kiya karte hain

kya kahen 'mir' ji hum tum se maash apni gharaz

gham ko khaya karen hain lohu piya karte hain