intibah

ai mere beTo!

maiñ sochtī huuñ

ki qadmoñ se

maiñ apne tan ke hayāt-āgīñ lahū ke chashme

bahā rahī huuñ

tumhāre saare

nazār jismoñ nahīf zehnoñ kī murdanī ko

miTā rahī huuñ

azal se apne za.iif chehre kī āḌī-tirchhī

sī jhurriyoñ kī lakīr meñ to

udaas āñkhoñ malūl palkoñ

se Tapke qatre

milā rahī huuñ

hasīn ḳhvāboñ ke būḌhe bargad

ke zard patte bhī chun rahī huuñ

vo ḳhvāb jin ke

chamakte jugnū

asiir karne ko merī bāñhoñ ke sāhiloñ par

safed chehre siyāh qālib

ġhanīm utre

hasīn ḳhvāboñ ke jugnuoñ ko

asiir kar ke

ḳhud apnī maaoñ kī sard āñkhoñ ko zindagī dī

mire dafīne mire ḳhazīne

se apnī kashtī

kī god bhar bhar ke le ga.e aur

mere beToñ ke zehn-o-dil meñ

tafāvutoñ aur adāvatoñ kī

karīh fasloñ ke biij bo.e

vo fasleñ jin ko

aziiz beToñ ne apne apne lahū se sīñchā

ki jin ke siine kī paak miTTī

ko garm taaza lahū se

har dam

ġhalīz rakkhā

aur mere beTo!

maiñ sochtī huuñ

isī tarah gar

tafāvutoñ aur adāvatoñ ke

ye biich bote

rahe to ik din

ye dekhnā tum

na tum rahoge na maiñ rahūñgī

faqat hamārī kathā rahegī!

ai mere beTo!

main sochti hun

ki qadmon se

main apne tan ke hayat-agin lahu ke chashme

baha rahi hun

tumhaare sare

nazar jismon nahif zehnon ki murdani ko

miTa rahi hun

azal se apne zaif chehre ki aaDi-tirchhi

si jhurriyon ki lakir mein to

udas aankhon malul palkon

se Tapke qatre

mila rahi hun

hasin KHwabon ke buDhe bargad

ke zard patte bhi chun rahi hun

wo KHwab jin ke

chamakte jugnu

asir karne ko meri banhon ke sahilon par

safed chehre siyah qalib

ghanim utre

hasin KHwabon ke jugnuon ko

asir kar ke

KHud apni maon ki sard aankhon ko zindagi di

mere dafine mere KHazine

se apni kashti

ki god bhar bhar ke le gae aur

mere beTon ke zehn-o-dil mein

tafawuton aur adawaton ki

karih faslon ke bij boe

wo faslen jin ko

aziz beTon ne apne apne lahu se sincha

ki jin ke sine ki pak miTTi

ko garm taza lahu se

har dam

ghaliz rakkha

aur mere beTo!

main sochti hun

isi tarah gar

tafawuton aur adawaton ke

ye bich bote

rahe to ek din

ye dekhna tum

na tum rahoge na main rahungi

faqat hamari katha rahegi!